'O QUADERNO D' 'E POESIE
Mmiezo 'a tanta rrobba vecchia e brutta
ce steva n'armadietto zuppariello e rutto
'nzeffunnato 'e cianfrusaglie e cose usate
ca pruvenevano quase sempe d' 'o passato.
Nu juorno ca me scucciavo d' 'o mmoderno
arapo 'o spurtiello e veco nu quaderno.
'A cupertina nera, 'a pagina c' 'a tabellina:
era chillo d ' 'e tiempe 'e ll'inchiostro 'e china.
Quanno ero piccerillo ce screvevo poesie
e ce mettevo 'o core e tutta ll'anema mia.
Erano semplici parole, manco tantu bbelle,
ca descrivevano 'e pprimme passiuncelle.
Ma erano 'o ffuoco ardente 'e nu vulcano
e cucevano 'o core e pure chesti mmane.
Erano lamiente, desideri e ppene d'ammore
e rignevano 'o rigo d' 'o quaderno con onore.
Guardaje 'o quaderno e m' 'o ggiraje mmano,
l'arapette e liggette coccosa chianu chiano.
Ricorde d'ammore vissute cu tanta passione
runzajeno 'ncapa e m'assalette ll'emozione.
Quanta nustalgia 'e chilli tiempe 'e na vota,
quanno l'ammore te turmenta e t'arrevòta.
Cride ca 'a vita va nnante sempe 'a ppoesia...
ma doppo t'accuorge ca era sulo fantasia.
(F.M.)
Nessun commento:
Posta un commento