Pagine

venerdì 17 luglio 2015

Gennaro Picone TORNO A CASA

L'amore non è bello se non è litigarello!

Certo la pace dopo un litigio se l'amore è sincero raffoza l'innamoramento:

TORNO A CASA

Torno a' casa, lla staje ca m'aspiette!

Cu 'e cchiave meie arape e trase,

t'astregne forte a mme mpietto.

Ma tu me guarde senza parlà,

e nun t'aggia manca tuccà!!!

Nu gelo int'o core me sento arrivà.

Te guardo e m'aspetto ca vuò parlà:

Traditore, nfame, busciardo, staje allluccà,

te scuoste e po insiste tutt'a voce a mm'o ddì.

Int'a poche minute se scatena 'a tempesta.

Cerco 'e sapé , ma è fernuta già 'a festa.

Finalmente riesco a sapéc

a faccio 'o zezo cu n'ata a vvedé.

Aggi voglia 'e giurà ca nun è accussì.

Niente da fare , tu continui a alluccà!

Se fa sera e ce jammo a ccuccà:

Dduje estranei simme int'o lietto.

Faccio finta 'e durmì, pure tu

faje finta 'e nun me penzà cchiù!

Ma pe ccaso na mano se tocca,

distrattamente , cu 'a toja se ntoppa.

Arapo ll'uocchie e accussì faje pure tu.

Ce guardammo e ddoje lacreme cadono giù!

Nun resisto e int'a nniente

t'abbraccio forte tenneramente.

Cu 'e vase t'asciutto 'e lacreme amare,

t'abbraccio ancora, pecché già me pare,

ca tutto è fernuto senza maje accummincià.

I' te voglio e nun pozzo campà,

tu si pe mme 'a felicità.

Versi di Gennaro Picone



Traduzione 

TORNO A CASA


Torno a casa , sei la ad aspettarmi!

Con le chiavi mie apro ed entro,

ti stringo forte al mi petto.

Ma tu mi guardi senza parlare,

e non ti devo neppure toccare!!!

Un gelo al cuore mi sento arrivare.

Ti guardo e mi aspetto che tu voglia parlare:

“ Traditore, infame, bugiardo, stai a gridare,

ti discosti e poi insisti a tutta voce a dirmelo.

In pochi minuti si scatena una tempesta.

Cerco di sapere, ma la “festa” è già finita.

Finalmente riesco a sapere:

che faccio il pagliaccio con un'altra a vedere (video-chat).

Ho voglia di giurare che non è così.

Niente da fare continui a gridare!

Si fa sera e andiamo a coricarci:

Due estranei siamo nel letto.

Faccio finta di dormire, pure tu...

Fai finta di non pensarmi più!

Ma per caso una mano si tocca,

distrattamente, con la tua si sfiora.

Apro gli occhi e così fai anche tu.

Ci guardiamo e due lacrime cadono giù!

Non resisto e in un niente

ti abbraccio forte, teneramente.

Coi baci ti asciugo le lacrime amare,

t'abbraccio ancora , perché già mi pare,

che tutto sia finito, prim'ancora di iniziare.

Io ti voglio e non posso vivere,

tu per me sei la felicità



FERDINANDO RUSSO Sinfonie d'amore




Ve vengo appriesso...



Ve vengo appriesso comme fa nu cane 
ca corre sempe appriesso a lu patrone, 
è ve guardo cu l’uocchie ’e passione, 
e sonno, e sonno, li ghiurnate sane! 
Ogge ve veco? E già penzo a dimane: 
“Dimane ’a vaco appriesso...! Faccio buone? 
“M”o menarrà, n’uocchio ’e compassione? 
E ’o core sbatte, e nfra sì e no rummane... 
Po’ vuie passate! Tutta janca e bella, 
cumm’ ’a chesti ghiurnate ’e primmavera, 
me parite nu giglio o na rusella, 
e ’o core mio ve chiamma: e l’uocchio dice: 
“Zuccariello d’ammore! Oi palummella! 
“Quanto, l’ammore tuio, pò fa felice!.. „ 
II. 
E vuie tenite!’ uocchie accussì doce, 
e nu surriso tanto aggrazziato, 
ch’io, si ve guardo, nce resto ncantato, 
e si vaco a parlà me manca ’a voce! 
So’ nnammurato, sì! So’ nnammurato! 
Comm’ ’a nu tizzo chistu core coce, 
e sbatte e sbatte, e corre cchiù veloce 
de nu cavallo ch'è scapuliato! 
Vuie che dicite? E nun tenite a menta 
ca site ’o suonno mio, suonno d’ammore, 
ca tutte li nuttate s’appresenta? 
Sì, s'appresenta, e nun me fa durmì; 
e stu turmiento amaro ’e tutte ll’ ore, 
core mio, core mio, ve l’aggia di’!... 
III. 
Ve l'aggia di'! Me basta na parola, 
nu signale, na mossa, na guardata! 
E’ chest’anema ardente e nnammurata 
vicino ’o core vuosto se ne vola! 
Dicitemmella, na parola soia! 
Mannatemmella, na meza mmasciata! 
Nun costa niente, na parola amata, 
e stu core scuieto se cunzola! 
Ah, quant’ è bella, dopp’ ’a notta nera,. 
n’alba rusata cu na lenza ’e sole. 
e doppo ’o vierno ’a luce ’e primmavera! 
Che pienze, core mio? Comme vuo’ fa? 
dimmelle sulamènte doie parole, 
ca sulamente tu, me può’ sanà! 




Te l'aggio ditto...



Te l’aggio ditto! St’uocchie miei parlavano 
comme parlava ’o core, 
e, fisse dint’ ali’ uocchie tuoi, cantavano 
na -canzona d’ammore! 
Quanno tu, janca comm’è ghianca ’a luna, 
m’accumparive e me tenive mente, 
da miezo ’o core mio saglieva tiennero 
nu suono ’e sentimente. 
'E se spanneva, e viaggiava all’aria 
comm’ all’ auciello, ca nun po’ sapé 
si va, si vene e quanto resta libbero... 
Ma ritornava a te! 
Tutto pe te! Tutto pe te! No spasemo, 
nu strillo ’e passione, 
na spina, nu turmiento, e dento palpete 
cchiù duce ’e na canzone! 
St' ammore mio t’ accarezzava l'anema 
comm’ a n’ addore ’e rosa o ’e giesummino, 
comm’ a li stelle ca p’ ’o cielo luceno, 
comm’ a nu suonno dint’ a nu ciardino... 
E tu sapive ca pe tte patevano 
l’anema, ’o core, ’a vita mia scujeta, 
comme patisce int’a nu sutterranio 
nu fravecato vivo sott’ ’a preta! 
Ah! Si st’anema mia putesse dicere, 
anze, si te sapesse fa capi 
tutt’ ’e ttempeste ca pe tte l'affocano 
e ciento vote ’o vonno fa muri, 
te diciarrìa ca chi stampai ca l’anema 
resta eterna e nun more, 
nun ha provato tuttuquante ’e spaseme 
ca po’ suffrì n’ ammore! 
Nun ha provato chello ca guardànnote 
stu core sape e nun s’’o ppo’ scurdà, 
e quant’ati suspire, e quanta làcreme, 
e che turmiente ancora ha da pruvà! 






Oi vocca doce.


Oi vocca doce, oi vocca nzuccarata, 
cchiù nzuccarata assai de l’uva spina; 
oi vocca sapurita, oi vocca fina 
che ’a sinfunia d’’e vase m’ ha mparata; 
vocca cianciosa mia, ca m’ ha cantata, 
senza voce, na museca strafìna; 
vocca zucosa cchiù de na curvina 
ca tutt’ ’a vita mia m’ha cunzulata; 
vocca ca sape tutt”a passione, 
vocca ca sola me po’ fa felice, 
armuniosa comm’a na canzone; 
st’ anema mia ca nun s’’a scorda mai 
s”a sonna sempe; e dint’ ’o suonno dice: 
Io tengo sete ’e te! Vaseme assai.... 



Na campana luntana 

manna ’e suone p’ ’o cielo... 
Sona n’ata campana 
cchiù vicina e cchiù chiana. 
Vola nu passariello 
ncopp’ ’a fenesta mia... 
st’anema ’nfantasia 
se mette a suspirà... 
E penza: ’o sole è d’oro, 
l’aria è serena e doce... 
Quanta campane, a coro! 
Che museca, sta voce! 
So’ sguigliate ’e vviole 
da l’erba d”e ciardine... 
Sulo na sepa ’e spine 
dinto a stu pietto sta! 
Pasca! È turnato Aprile! 
Tutto se sceta, attuorno! 
Sento n’addore ’e rosa... 
l’aruta è cchiù addurosa... 
L’uocchie d”a gente luceno, 
’o cielo è nu tesoro... 
Quanta campane, a coro! 
Quanta felicità! 
Tutto se cagna, e piglia 
na faccia cchiù cuntenta... 
Dinto ’e ciardine ’a menta 
se fa cchiù verde, e sguiglia... 
Veco, da na fenesta 
rimpetto a me, luntana, 
nu saluto ’e na mana... 
Va trova addò jarrà...! 
A me, no, certo! Io stongo 
comm’a chillo ch'è nato 
cecato... Ma cecato 
senza putè sperà 
ca nu juorno, nu raggio 
lle riturnasse ’a vista... 
E chesta vita nzista 
s’affanna a sbarià! 
Pasca! Nu mare ’e sciure 
venute ’a paraviso 
ncopp’a lu munno è sciso 
pe cunzulà ’e delure... 
’A gente va p”e strate 
cu ’e ppalme, e dice: “Pace! „ 
Che balzamo verace 
chesta parola dà! 
Pasca! Nu passariello 
zompa ncopp”o balcone 
e canta na canzone 
cu ’o stesso riturnello: 
“Ci-ci... Che fai? Che pienze? 
“Chill’uocchie addulurate 
“addò stanno ’ncantate? 
“Addò vanno a guardà? „ 
Io guardo a chella mana, 
mana luntana e ghianca, 
ca da chella fenesta 
saluta, e mai se stanca.... 
A chi va, chillo segno? 
A chi, chillo saluto? 
E ’o core appecundruto 
se sfoca a smanià... 
Pur’ io, pur’ io, na vota, 
tenevo a na manella 
sfusata e tunnulella 
pe farme accarezzà... 
Ma stu ricordo caro 
ca m’è rummaso 'ncore, 
è muorto cu l’ammore 
tante, tant’anne fa! 
Pur’ io, na faccia d‘ angelo 
aggio vasato mmocca, 
vocca ’zucosa ’e zuccaro 
comm’ ’e ccerase a schiocca... 
E st’uocchie ca mo chiagneno 
p”o bene, ahimmè, perduto, 
pure l’hanno saputo 
l’ammore che po’ dà! 
Pasca! Serena è ll’aria 
e sonano ’e ccampane! 
Attuorno, ’e rrose sguigliano... 
Se ntrezzano li mmane... 
Sulo ’o ricordo caro 
ca fa speri stu core, 
se perde cu l’ammore, 
tante... tant’anne fa... 


E t'aggio vista.. 


E t'aggio vista, o Bella ‘e tutt’e Belle, 
cu l’uocchie cchiù lucente e appassiunate 
Uocchie d’ ammore, ca m’aggio suonate 
guardanno ’o cielo e cuntemplanno 'e stelle. 
Si’ tù, si’ sempe tu, Core ’e stu core, 
nata pe fa suffrì comme soffr’io! 
Luce d”o sole e Sinfunia d’Ammore, 
sciore d”e sciure, e sentimento mio! 
Si’ tu, si’ sempe tu, Raggio de luna, 
Culonna d’oro e Specchio ’e passione; 
Fata d”e Ffate, Rota d”a Furtuna, 
Curona ’e perle, Stesa ’e na canzone! 

Si’ tu, si’ sempe tu! T’ aggio guardata, 
e ’o core mio, comm”a na lampa ‘e fuoco, 
ha suspirato e ha fatto una alluminata, 
ca p”a stutà tutto nu mare è poco! 
E nnanz’all’ uocchie tuoi, criate ’a Dio 
pe fa vedè ca ’e stelle nun so’ niente, 
chist’uocchio stanco e addulurato mio 
t’ha dato ’a luce ’e tutt”o sentimente! 
Io vasarria la strata addò camminò, 
e, si vulisse, te farria vedè. 
comme stu core, puntiato ’e spine, 
desse turmiente, e palpete pe te! 
E chest’anema mia, si mo putesse, 
comm’ a na rosa t’’a vurria purtà, 
e cuntento sarria si t’’a vedesse 
fronna pe fronna, mmano a tte, sfrunnà! 


Che fai, tu sola?

Che fai, tu sola? Pienze quacche vota 
a chi sonna 'a luntano e se dispera? 
Comm’ a na stella int’ a na notta nera 
dint’a st’anema mia dài luce tu... 
Ma mo che fai? Me pienze, quacche vota? 
O puramente nun me pienze cchiù? 
Pienzeme assai, ca songo scuraggiato! 
Me passano p”a mente tanta cose... 
Veco cchiù spine, attuorno a me, ca rose, 
e manco ’o sole me cunzola cchiù... 
E stu core se sente abbandunato... 
Strazzio che può’ capì sultanto tu... 
Tu ca si’ bella e tiene ’o core bello, 
e tiene l’uocchie tanto appassiunate; 
tu, ca passave sti manelle amate 
dinto ’e capille miei pe me vasà, 
chisto core scujeto e puveriello 
tu sulamente ’o può’ cunziderà! 
Io me metto paura! A me me pare 
ca sta felicità ca m’è venuta, 
da quanno, Bella, t’ aggio canusciuta, 
da quanno, Cara, me diciste sì, 
s’ha da cagnà cu ciento pene amare, 
de ciento morte m’ha da fa muri! 
Nuttata nera ca me mette nfronte 
penziere nire e làcreme p’ ’o chiante! 
Nuttata nera e sventurato amante 
ca se dispera senza nu pecchè...! 
St’anema mia corre da mare a monte, 
sbatte comm’ a na tenca e chiamma a te! 
E nisciuno, nisciuno me risponne! 
E pure ajere ’o core mio sperava! 
Pure ajere, sta vocca te chiammava 
e ’o penziero vulava addò stai tu! 
Varca sbattuta mmiezo ’a furia ’e ll’ onne, 
st’anema mia nun s’accujeta cchiù... 


Sto guardanno stu sciore...

Sto guardanno stu sciore ’e passione 
ch'è tuttaquanta 'a passiona mia! 
E ’o core sbatte, e nun se fa raggionc 
comm’ha pigliata chesta malatia...! 
Sto guardanno stu sciore ’e passione! 
Parla stu sciore, e cu l’addore dice: 
“Quanto stu core tuio, vo sta malato! 
“Quanto, st’ammore, t’ha da fa ’nfelice! 
“Quanto scujeto, e quanto addulurato! „ 
Parla stu sciore, e cu l’addore dice. 
Comm’ha penato Cristo ncopp”a croce, 
soffre chisto penziero assai sbattuto! 
Senza nisciuno ca Ile dà na voce, 
senza nisciuno ca Ile dà n’ajuto, 
comm’ha penato Cristo ncopp”a croce! 
Cheste so’ ’e llance—e m’hanno acciso ’o core, 
e tuttuquanto l’hanno nzanguinato! 
Nce veco ’a Morte, dinto a chisto sciore 
accussì cumbinato e appassiunato! 
Cheste so”e llance,—e m’hanno acciso ’o core! 
E cchesta ccà, chest’ è ’a curona ’e spine, 
spine pugnente, ca pugnuto m’hanno! 
Nun cresceno cchiù rose, int”e ciardine? 
Sti rame, attuorno a me, na sepa fanno! 
E chesta ccà, chest’è ’a curona ’e spine! 
Chiste so’ ’e chiuove, e a te m’ hanno nchiuvato 
comme a tanno nchiuvàino ’o Salvatore! 
Me sento ’o core tutto martellato, 
e ’npietto nu Calvario de dulore! 
Chiste so’ ’e chiuove, e a te m’hanno nchiuvato! 
E chiste so’ ’e martielle, Anema mia, 
martielle ca nun sentono raggione! 
Manco si se trattasse ’e na pazzia, 
m’hanno nchiantato ’npietto ’a passione! 
E chiste so”e martielle, Anema mia! 
E chesta è ’a scala pe ddo’ so’ sagliuto 
pe correre addu te, Turmiento amato! 
Nce so’ arrivato, ma nce aggio patuto 
comm’a Giesù, ca tanto ha suppurato! 
E chesta è ’a scala, pe ddo' so’ sagliuto! 
E chesta è ’a spugnetella ’e fele amaro, 
ca m’avvelena ’o suonno mio d’ammore! 
Ah suonno turmentuso, ah suonno caro, 
ah suonno eterno, suonno ngannatore! 
E chesta è ‘a spugnetella ’e fele amaro! 
Sciore adduruso de l’ammore mio, 
sciore cianciuso ca muri me fa, 
si nun me siente, tu nun siente a Dio! 
Guardeme assai e nun me fa dannà! 
Sciore adduruso ’e chisto core mio, 
sciore cianciuso ca muri me fa! 


Guardeme assai!...

Guardeme assai! Dint’achist’uocchie d’angelo 
cchiù care de nu suonno ’e sentimento, 
veco passà, comm’ a nu velo, ’e llacreme; 
e dint’’o core na tristezza sento... 
Guardeme assai!’ Chesti guardate traseno 
comm’ a ddoi spate, dint’ ’o core mio... 
Guardeme sempe, pecchè aio’ fernesceno 
sti juorne belle, e nce dicimmo: addio! 
Tu, che st’ammore mio nun ’o vuo’ sentere, 
siente nu poco, almeno, a stu delore! 
No, cierti ccose non se ponno dicere 
si nun sagliene nette ’a dint’ ’o core! 
E si ’o core nun soffre tutt’ ’e spaseme 
che n’ ammore po’ dà, priesto perduto, 
senza sincerità nun pò’ fa credere 
nu sentimento ca nun ha sentuto! 
Guardeme assai, ca chisto desiderio 
(ricuordatello!) me l’hai dato tu, 
quann’io, ca nun putevo cchiù resistere, 
t’ammenacciai de nun guardarte cchiù! 
Aprenno ll' uocchie comm’ ’e rrose s’apreno 
tu me diciste, (e nun m’’o scordo mai!) 
me diciste accossì: — No, nun po’ essere! 
Guardeme sempe, a me! “Guardeme assai 1 „ 
Embè, te guardarraggio p’anne e secule 
sapenno certo quanto aggio ’a paté, 
si pure doppo a chesta vita misera 
ll’uocchie d’’o core cercarranno a te! 


Chelli ffronne..


Chelli ffronne ’e carofano schiavone 
pareno ’e ggocce ’e sangue ’e chisto core! 
Pareno ’o ffuoco ’e tutto chest’ammore 
ca m’hai saputo fa veni pe tte! 
Comme venette? E tu, comme faciste 
pe ttrasì tuttaquanta ’npietto a me? 
Saccio sultanto c’ ’a primma guardata 
me dette ’e smanie, tutta chella sera! 
St’ anema mia, tanto malata e nera, 
se rischiaraie, senza vulè sperà... 
Chella guardata fuie nu raggio ’e luna, 
che scenne, doce doce, e fa sunna! 
E da tanno, pe tte, me so’ mpazzuto, 
e t’ aggio vista, e t’ aggio suspirata! 
Senza putè durmì, t’ aggio sunnata, 
cercannote cu l'uocchie ’a carità... 
E vivo o muorto, vicino o luntano, 
sempe, st’anema mia, te sunnarrà! 


Te veco sempe!


Te veco sempe! Sott’ ’a luna chiara, 
dint' 'a nuttata ca nun me dà suonne, 
tu me cunzuole chesta vita amara, 
e ’o core mio te sente e te risponne. 
M’accumparisce mmiezo a cante e suone, 
e chiano chiano già t’accuoste a me, 
e puorte scritta nfronte ‘a passione... 
Ma dint’a chisto core io porto a te! 
Passano ll’ore. ’O suonno mai nun vene, 
T anema mia te chiamma e nun se stanca! 
Na lava ‘e fuoco me scorre p’ ‘e vvene, 
desideranno sta inanella janca... 
E spaparanzo l'uocchio addulurato 
quase pe t’ attirà, pe t’ assurbì, 
comme farrìa nu povero assetato 
ca pe mancanza ’e l’acqua po’ muri! 


E quanno finalmente s’ arreposa 
l’uocchio abbattuto p”a troppa stanchezza, 
te vede ancora cchiù maravigliosa, 
cchiù risplennente e bella d”a Bellezza! 
Ah! Suonno caro ’e chesta vita nera, 
palomma janca mia, nun te stancà! 
Tu puorte scritto nfronte ’a Primmavera, 
ma dint' ’o core mio lu viemo sta! 


Tu me vuo’ bene


Tu me vuo’ bene! ’O ssento dint’ 'ali’ aria 
ca t’accarezza sti capille amate, 
e me n' addono quanno veco lucere 
l’ammore int’ a chili’ uocchie appassiunate! 
Tu me vuo’ bene! Quanno veco schiudere 
sta vocca bella, cara e piccerella, 
cchiù sapurita e rossa de na fravula, 
cchiù carnosa ’e na rosa ncrispatella, 
io penzo, e sonno, e sento ’ncore scennere 
comm’a na luce mbalzamata ’e luna; 
e nchiudo l’uocchie, e già me credo d’essere 
purtato ncopp”a rota d”a Furtuna... 
E te veco! E nu raggio dint’all’anema 
me scenne a rischiarà sta vita nera, 
e te cunosco; e me figuro a n’ angelo, 
quanno me stienne sti mmanelle ’e cera! 
Io m’addenocchio. E mille vase chiòveno 
ncopp’a sti mmane... E mille ancora, e mille... 
E nun me stanco; e pare ca se mbrògliano 
’e ricciulille tuoi cu sti capille. 
E me scordo l’affanno, ’o chianto, ’e llàcreme 
ch’aggio patuto primma ’e te vedè, 
e ll’uocchie tuoi redenno me cunzòlano 
e resto addenucchiato nnanz’a te! 
Ma ’o suonno passa! ’O core torna a sbattere, 
na voce torna a di’: Nun te vo’ bene! 
Pazzo de frenesia, me metto a correre 
pe te cerca, cu ’o (fuoco dint”e vvene, 
e te trovo, e te veco! E ciento spaseme, 
comm’a ciento pugnale avvelenate, 
fanno na tarantella dint’a st'ànema 
addò chill’uocchie tuoi stanno nchiuvate! 
Ah, Suonno d’oro, Suonno ca nun sazia! 
Perdona ’e smànie de stu core mio! 
Te voglio bene quanto se po’ dicere! 
Quanto — te giuro! — se vo’ bene a Dio! 


Rose addurose...

Rose addurose ’e maggio! Int’ ’e ciardine 
nce sta n’addore d’erva mbalzamata! 
Spòntano mprufumate ’e ggiesummine, 
tutt”a campagna 'e sciure è puntiata. 
'O sole ndora ’o munno attuorno attuorno, 
arriva addò le pare d’arrivò, 
e cu ’o saluto e cu lu buono juorno 
l’aneme triste corre a rischiarò. 
Ncopp’ ’a fenesta mia, na rosa ’e maggio, 
cu nu culore ’e carna tennerella, 
se fa cchiù rrossa sott’a chisto raggio, 
e cchiù s’arape, e cchiù addeventa bella 1 
’O sole ’a vasa mmocca tuttaquanta, 
comm’a na vota io te vasavo a tte; 
ah, stiennamella, chesta mana santa, 
torna a vulerme bene e a penzà a me! 


Castiello d’oro...


Castiello d'oro, campaniello ’argiento, 
uocchie lucente comm’a nu brillante, 
faccella culurata ’e sentimento, 
m’ite rummaso scunzulato amante! 
Bellezze meie tanto desiderate, 
comm’ ’a croce venette pe Giesù, 
è venuto ’o Destino e v’ha squagliate... 
Addò ve cerco? Addò ve trovo cchiù? 
Làcreme amare comm”o ffele amaro, 
suspire nire ’e nu perduto Ammore, 
d’’a passiona mia ricordo caro, 
ribbazzato pe sempe int’ ’a stu core; 
vuie site ’o suonno ’e tutte li nnuttate, 
vuie site ’a spina ca penà me fa, 
e, pe stu core, tanta curtellate, 
ca nun se ponno mai cchiù resanà! 


A farte bella...


A farte bella Dio nce s’è spassato, 
ma mo’ cu mme te stai spassanno tu! 
T”e miso mmano chisto core mio 
comm’a na pazziella ’e criatura! 
Bella e crudele, tu nun hai paura 
de farle male e d’’o putè spezzò! 
L’’e dato corda, e mo t”o guarde e ride; 
isso cchiù strilla, e tu cchiù ’o fai strilla! 
Che vuo’ da me? Vuo’ vencere? ’E vinciuto! 
Stu core ha ditto sì! S’è cunfessato! 
Primma redeva, e tu nun l”e vuluto, 
e ha perduta ’a scummessa e s’è cagnato! 
Li ppónte acute de chist’ uocchie belle 
l'hanno passato a pparte a pparte; e mo, 
doppo d’averlo miso mmiezo ’e stelle, 
t”o miette sotto, ’e piede e dice no! 
Ha cantato, pe tte, cose d’ammore 
ca mai nisciuno te l’aveva ditte! 
Nzanguinate, cu affanno e cu delore 
t’ ha scritto cose ca nisciuno ha scritte! 
S’è tutto apierto comm’a nu granato 
e ha ditto: Fa de me chello che vuo'! 
Ma tu l’’e visto tanto addulurato, 
e, Bella e Nfama, T ’e rispuosto: No! 
Suddisfatta e cuntenta, allegramente, 
mo’ ca stu core ha perzo ogne virtù, 
redenno d”e delure e d’’e lamiente, 
tu nce pazzie, ma nun te mporta cchiù! 
E nun fa niente! Sulo l’è abbastato 
de sapè buono ’o spantecà che d’è; 
e, comme Giesù Cristo ha perdunato, 
isso perdona e benedice a te! 


Stu cielo...

Stu cielo nun me pare cchiù celeste, 
e chisto mare nun me parla cchiù! 
Dint’ a stu core mio tutt’ ’e ttempeste 
so’ scatenate, ’a che nce manche tu! 
Core scuieto, afflitto e puveriello, 
ca sta murenno e nun po’ chiammà ajuto! 
Muri na vota sola è assai cchiù bello 
ca muri ciento vote ogne minuto! 
Io guardo ncielo: ‘a stella cchiù lucente 
me pare nera comm’a notta nera; 
e na lava de lacreme cucente 
m’abbrucia l'uocchie comm’a na vrasera! 
E penzo, e sonno, e me ricordo, e chiagno, 
speruto, Ammore mio, de te vedè, 
e me pare 'e sentì, dint’ a nu lagno, 
ca tutt’ ’o munno chiagne appriesso a me! 
Ah! Me credevo d’essere cchiù forte, 
e me credevo ’e tenè cchiù speranza... 
Ma t’ aggio ’a di’ ca peggio assai d’’a Morte 
so’ sta mancanza e chesta luntananza! 
Me sento ncapo ’a tarla d’’a pazzia, 
ca tu vulenno, nun t’ ’a sunnarrai! 
E me dà nu turmiento e n’ agunia 
ca dura sempe e nun fernesce mai! 
Me pare ca nun sguigliano cchiù sciure, 
ca tutt’'e ggente tribbulate vanno; 
ca dint”o core mio tutt”e delure 
de tutt”o munno appantanate stanno... 
Nchiudenno l’uocchie, embè, te veco, è overo, 
ma tu, cchiù nun ce stai vicina a me! 
Te tengo tuttaquanta int’ 'o penziero, 
ma... chi me stregne ’a mano comm’a te? 
Chi me dà forza? Chi me dà curaggio? 
Chi me dà vita, mo’ che manche tu? 
A tutte, ’o sole po’ menà nu raggio, 
ma ‘o raggio ’e l’uocchie tuoi nun vene cchiù! 


Bella



Bella’ ca de li belle si’ riggina, 
uh quanta pene ca faggio ’a lassare! 
T' aggio ’a lassare dimane mmatina, 
ca ‘o vasciello me porta ’a fora 'o mare! 
Dint' ’a stu core nce tengo na spina, 
ca me fa ’o sango perdere a sciummare; 
bella, tu m”a può’ dà, na medicina, 
famme sta grazzia, si me la può fare! 
L’ammore, ch'accummencia pe pazzia, 
fernesce sempe cu suspire e guaie! 
N’angela ‘e cielo chiammata Maria, 
truvaie stu core spierto e s”arrubbaie! 
Apprimma io nun perdette l’allegria, 
’a facette partì, nun ce ’o cercaie, 
ma mo, sulo e desierto, ’a casa mia, 
vaco alluccanno sempe: — Addò starrate?! 
Fronna d’aruta ch’ogne male stuta, 
vide stu ffuoco si m’’o può stutare! 
L’anema mia che ghiuta e ch'è venuta 
sperava sempre ’e nce putè parlare! 
Ma mo tutt”a speranza aggio perduta, 
e a lietto cchiù non pozzo arrepusare, 
e st’anema, lassata trista e muta, 
va jenchenno de lacreme nu mare! 


Nnanz”o canciello...


Nnanz”o canciello d”o ciardino richiuso, 
st’anema mia, tremmanno, s’è fermata. 
Faceva friddo. N’aucelluzzo nfuso 
zumpettiava ncopp”a ferriata. 
Luntano, mmiezo all’erba scarpesata, 
aggio visto, cu l’uocchio pauruso, 
’a casa cu ’a fenesta ribazzata 
e so’ rummaso tutt’appecundruso... 
E m’è parza na casa abbandunata, 
mmiez”o ciardino, cu ’o canciello nchiuso... 
’O cielo ’è vierno, tutto annuvulato, 
chiuveva nterra làcreme ’e delore. 
Sott”a stu chianto io me songo abbagnato, 
e aggio ntiso d”e llàcreme ’o sapore... 
Nu juorno sano sano aggio, passato 
penzanno sempe e nun cuntanno ll’ ore, 
e 'o core mio tremmanno t’ ha chiammato 
e ha cercato nu suonno ngannatore. 
E aggio aspettato... E quanto aggio aspettato! 
E me scenneva ’a notte dint”o core... 

E so’ turnato ’a casa e faggio scritto, 
e ’a carta ’e chianto amaro s’è ammacchiata! 
E faggio apierto ’o core, e faggio ditto 
quanto, st’anema mia, t’ha suspirata! 
Io stesso, tristo, appaurato e afflitto, 
so’ ghiuto ’a posta e ’a carta aggio mpustata, 
e ’o juorno appriesso, sulo e zitto zitto 
me so’ fermato nnanz”a cancellata... 
Ma nterra llà (chi me l’avesse ditto!) 
aggio truvato ’a lettera... stracciata! 


T'aggio sunnata


T’aggio sunnàta int’a na varca d’oro 
mmiezo a chest’acque de Venezia mia, 
addò, guardanno attuorno, è nu tesoro, 
suonno de l'uocchie e de la fantasia! 
Vista e nun vista cchiù, faggio suonata 
e aggio strette sti. braccia attuorno a te! 
E chella vocca bella aggio vasata, 
ca sape di’ l’ammore che rrobb’è! 
Metteva ’o sole, dint’ 'o cielo chiaro 
e dint’ 'o core mio, na striscia ’e fuoco. 
’A varca jeva senza marenàro, 
tu me murive nbraccia a poco a poco... 

E jévamo accussì, pe sta lacuna, 
palpetanno d’ ammore comm’a cche; 
po me parette che saglieva ’a luna, 
comme st’anema mia saglieva a te! 
Ma ’o suonno è suonno! Sulitario e muto, 
vaco giranno comm’a nu dannato! 
Sta varca ca me porta è nu tavuto, 
e chisto cielo è tutto annuvulato... 
E sti bellezze ca me stanno attuorno 
nun songo belle! E vuo’ sapè pecchè? 
Pecchè penzo ch’annotta a miezojuorno 
quanno tu nun ce stai, vicina a me! 


Oi stelle...


Oi stelle ca currite pe lu cielo 
e cu nu filo ’e. fuoco vuie filate, 
pe piacere, diciteme addò jate, 
pecchè nzieme cu vuie voglio veni! 
Jate luntane? E quanno ve fermate? 
Stelle lucente, m”o vvulite di’? 
Stelle lucente, jate addò dich’ io! 
Addò l’ammore mio v’aspetta e penza... 
Voglio veni cu vuie! Date licenza 
a chisto core stanco d’aspettò! 
Na luntananza e na mala spartenza 
l’hanno fatto assetato addeventà! 
Vuie ’a sapite, oi stelle ca currite! 
Tene duj’uocchie ca so’ comm’a vvuie! 
E nce simmo abbruciate tutt”e dduie 
e st’uocchie ’a vonno, p”a putè vedè... 
Stelle, vuie nun sapite comme fuie 
ca ’o ffuoco lloro m’ ha distrutto a me! 

Stelle lucente, stelle ca filate, 
stelle che gghiate e ve purtate ’o core, 
cunziderate vuie, stelle d’ ammore, 
ca chisto pietto cchiù nun po' suffrì... 
Passano, oi stelle, a ccentenare, ll’ore, 
e pareno mill’anne!... È nu munì 
Addò vedite doie cumpagne belle, 
oi stelle d’oro, oi stelle ca currite, 
fermateve a guardarle, e Ile dicite 
ca, disperato, io perdo ogne virtù! 
E nun me cuffiate, e nun redite, 
pecchè st’anema mia nun ne po’ cchiù! 


Tu duorme...


Tu duorme, io veglio! E quanno sto sedato, 
pecchè ’a notte nun pozzo arrepusà, 
te sonno, e cu chist’uocchio affaticato 
te veco dint”o suonno smanià! 
Che stai, sunnanno, Sciore ’e passiona? 
Pozzo spera? Pozzo sapè che d’è? 
No! So’ pazzo! Perdonarne! Perdona! 
Io nun me credo ca te suonne a me! 
Io nun me credo ca tu me vuo' bene, 
e, ’a verità, nun ce aggio mai creduto! 
Ma penzo a stu Destino, e a chesti ppene, 
e a chisto core, appriesso a te perduto! 
Duorme cuntenta, Sciore mio d’ammore! 
E quanno ’o sole all’alba arriva a te,. 
te porta tutt’’o fuoco ’e chistu core, 
ma nun fa niente, si nun pienze a me! 
Quanta vote, tremmanno ’e sta pazzia, 
aggio tanto penzato ’e te scurdà! 
E quanta vote chest’anema mia 
ha ditto all’uocchie miei: Nun 'a guardà! 
Ma pe fa chesto, Core mio d’ammore, 
pe nun te suspirà, pe nun patì, 
n’ ommo, che t’ha fissato a tutte ll’ ore 
nun ha da fa nient’ato: ha da' muri! 
Duorme! Io te metto na curona ’e rosa 
ncopp’a sta fronte e a sti capille nire! 
Duorme, nun penzà a me! Duorme, arreposa! 
Tutt”e spine ’e ttengh’io! Tutt”e suspire! 
Voglio sunnà cu l’uocchie apierte ancora 
e albanno juorno te voglio vede 
schiudere chella vocca arrobbacora 
comm’a nu sciore ncopp’a nu buchè! 
E voglio cadè. stanco e affaticato 
nun saccio addò, pe te putè sunna, 
cchiù bella de nu sciore ch'è sguigliato, 
ma cchiù crudele ’e tutt”e nfamità! 


Stongo screvenno

Stongo screvenno: e ’o primmo raggio ’e sole 
me vene a ndurà ’e ccarte nnanz’a me... 
Sia beneditto! Isso me dà ’e pparole: 
bello e lucente, rassumiglia a te! 
Isso me dice: “Pàrlele d’ammore! 
“Pàrlele sempe e mai nun te stancà! 
“Dille ca tene ’a vocca eh' è nu sciore 
‘ e l’uocchie suoi songo na rarità 1 
“Dille ca tu, cu ’o core appassiunato, 
“’a vurrisse purtà vicino ’e stelle, 
“pe lle di’, nnanza ’e piede addenucchiato: 
“Bella, sultanto tu, nfra tutt’ ’e belle! „ 
Ah, sole mio cocente! Ah, sole ’e fuoco, 
ca chisto core mio viene a scetà, 
pàrlace tu, cu Essa, pe nu poco, 
e falle capì tutt' ’a verità! 
Falle capì ch'’a voglio tanto bene, 
ca, si vulesse vederme muri, 
io lle darrìa, cu ’o sangue ’e chesti vvene, 
sta vita mia, dicenno sempe: Sì! 
Guarda: aggio scritto! ’O primo raggio ’e sole 
m’arriva nfronte, e vene a rischiara 
tutt’ ’e penziere! Addórano ’e vviole! 
È primmavera! ’O vierno nun ce sta! 
Nun ce sta niente! Nc’ è l’ammore mio! 
St’Ammore ca te vasa e t’accompagna, 
ca crede a te, comme credesse a Dio, 
speranno tutt’ ’o vverde d’’a campagna! 
Speranza grossa! Speranza felice! 
Ajere, cu chill’uocchie ’e passione, 
diciste cose ca nisciuno dice, 
chiene de tenerezza e spressione! 
Io te guardava e nun me sazziava! 
Tutto pareva bello attuorno a me! 
’O cielo, ’o sole, ’o mare me parlava, 
e me diceva: È bella! E over’è! 
È bella! È bella! È bella! È troppo bella! 
Spànteche, suoffre, muore, ma che fifa! 
È caduta da ’o cielo! È rara! È stella! 
Guàrdala mmocca! E resta a suspirà! 


Guardeme sempe


Guardeme sempe! Guardeme, 
pure quanno de me cchiù nun te mporta! 
Chist’uocchie miei, stu core, se cuntentano, 
pure si fosse na guardata storta! 
Guardeme! ’A dint’all'anema 
saglie sta voce, ammore mio crudele! 
Nun m’’e pozzo scurdà, chist’ uocchie d’angelo, 
chesti ddoi stelle ch’arrubbaste nciele! 
Pazzo e scuieto, (pènsace!) 
tu m'’e miso n’appicceco int”o core! 
L’anema e isso, ciento vote, giurano; 
ma po’, giuranno, moreno d’ammore! 
Giurano e se prummettono 
de te scurdà, de nun guardà... Ma che! 
Si n’ora nun te vedono, 
scorreno sangue, e chiagneno pe tte! 
Tu l’’e vulute, e tuttuquante ’e palpete 
de chisto core a tte songo venute! 
Mai comm’a mo sti spaseme, 
accussì forte, mpietto aggio sentute! 
Mai comm’ a mo me songo ntiso scennere 
mpietto ’e gguardate toi comm’a ddoi spate! 
Songo luce d’ammore e songo làcreme, 
so’ ragge ’e sole e songo curtellate! 
Te ricuorde? Sti mmane accarezzavano 
chilli capille tuoi, chella faccella... 
Mmiezo ’e vase, sti labbre murmuravano, 
tremmanno, ’o nomme tuio, dicenno: Bella! 
E chistu core, ca sentette ’e palpete 
d”o core tuio, ca mpietto a me sbatteva, 
steva murenno, e riturnaie a nàscere, 
e spantecanno, te benediceva! 

Tu te ricuorde? ’A vocca toia, vasannome, 
chiammava, mmiezo ’e vase, ’o nomine mio; 
e chill’ammore me facette ndènnere 
comme po’ n’ommo addeventà nu ddio! 
Mo te veco ’a luntano! ’O core smania, 
l’anema soffre mille vote e mille, 
’a vocca tremma, ’e mmane me se torceno, 
ca vonno accarezzà chilli capille!... 
'E tutt”o sangue mio me sento voliere 
da dint”e vvene, e scotta comm”o (fuoco; 
e stu core, furnace ’e desiderio, 
ardenno se cunzuma, a poco a poco!... 
Fallo pe carità; nun me fa struiere; 
nun me dà cchiù tutte sti mmorte ogn’ora! 
Viene addu me; viene cu me; cuntentame! 
Fatte vasà, si me vuò bene ancora! 

Nchiudimmo ’o libbro!...


Nchiudimm’ ‘o libbro I Dinto nce sta scritto, 
punto pe punto, ’a storia ’e chisto core; 
chello ch’aggio sunnato e ch’aggio ditto; 
gioie, speranze, smanie, ogne delore! 
Nce stanno sentimente, affanne e lacreme, 
turchino ’e cielo, voce ’e primmavera, 
e tutte li suspire, e tutt' ’e spàseme 
suppuriate pe tte, Stella d”a sera! 
E l’uocchie tuoi nce stanno, l’uocchie belle 
ca male p bene m’hanno fatto assaie! 
Nce stanno rose, e spine, e luce ’e stelle, 
e ’a vocca toia ca tanto me vasaie! 
Passa, pe miezo a tutte chesti pàggine, 
suspiranno pe tte, l’anema mia, 
e vede sempe a chella faccia d’angelo, 
muntagna d’oro, e specchio ’e simpatia! 
Viato a chi nun penza all’avvenire, 
a chi nun tremma ’e chello che sarrà, 
e marina arreto li penziere nire 
e se cuntenta d”a felicità! 
Io, ca guardo luntano e sento ’e palpete 
de stu core perduto appriesso a te, 
addenucchiato, te ne prego: Scordarne! 
Fa comme mai m’avisse visto, a me! 
Venarrà riempo, — (che penziero tristo!) 
ca manco sunnarrai ca t’aggio amato 
Ca manco sunnarrai d’averme visto 
tanto scujeto e tanto nammurato! 
Nun penzarrai ca cu sta vocca ’e zuccaro, 
vocca azzeccosa e doce quant”o mmèle, 
pe tramente int’ all’ uocchie nce guardavemo, 
m’hai dato ’e vase ca se danno ’nciele! 
Nun penzarrai ca stretta a mme, dicive: 
“Guardeme sempe e nun te stanca maie! „ 
Ricordatalo! Tu nun ce credive, 
a chist’ammore che me nnàmmurate! 
Venarrà tiempo — (che penziero niro!) 
ca turnarraggio strànio pe tte! 
Ah, comme tremma, dint'a nu suspiro, 
st’anema disperata, ’npietto a me! 
Io songo comm’a chi, nun nato ancora, 
già penza ’a morte e già se mette ’o ilutto! 
Sia maleditto ’o mese ’o juorno e ll’ora 
ca t’aggio vista, e nun me so distrutto! 
E maledetta sia, perseguitata, 
sta vita mia ca nun se vo’ spezzà; 
st’anema mia, appriesso a te, dannata, 
ca resta eternamente a spantecà! 
Nchiudimm”o libro ll’uocchie già se nchiudono 
pe nun te guardà cchiù, pe nun vedè 
comme dimane tu, penzanno a n’auto, 
m’avrai acciso senza nu pecchè! 
Te cerco sulamente n’auta grazzia, 
l'ultima, Ammore mio, ca me può’ fa: 
Vasa stu libbro, ncopp’ a chesta paggina 
e ’o core mio se sentarrà vasà!