Carmine Barretta ‘NU PENZIERO...

Forse per alcuni possono sembrare delle frasi astruse, 

quasi astratte. Ma se ognuno di noi infila la mente

nei reconditi pensieri...qualcosa vi troverà.

Dedicata a tutte le mamme. Auguri a loro

di Carmine Barretta

‘NU PENZIERO...

Sicuramente faje peccato,

quanno ancora ce sta e

manco te ne accuorge.

Spisso te ‘ncazze pecchè

dice sempe ‘a stessa cosa.

Te fa mille domande:

“Comme staje? Staje nervuso?

 casa tutto a posto?

‘E criature stanno bbone?

Te veco sciupate…mange?

Mugliereta sta bbona?

Pecchè nun vène maje?

Manco me telefona.

L’aggio fatto qualcosa?

Tene tiempo pe tutte quante…

sulo pe me ‘o tiempo nun ’o trova.

Va ‘nciucianno tuorno tuorno…

venesse maje ‘na vota a m’addurà.

Mettitavella ‘ncapa…finchè ce sto…

i’ so’ capa e nun so’ cora.

Puòrtece chesto ‘e guagliune…

nun ’e veco a tantu tiempo.

Puortammelle a vedè…ògne tanto.

Guagliò pecchè staje niro?

‘E cose vanno bbone?

Nun me facite sapè maje niente

‘e tutto chello ca ve succede.

Viene ccà…assiettete vicino a me.

Statte n’atu poco, pecchè

ggià te ne vaje, vaje ‘e pressa?

”

Tu zitte, nun parle, nun pepetìe.

T’’o siente tutto ‘o riturnello,

sî abituato, risposte nun ne daje...

o forze nun ne tiene.

Ce vaje ‘nu juorno sì e uno no.

Passe pe sapè ca ‘a tiene ancora.

Ca sî ppate… ma ancora sî figlio. 

Essa se n’accorge e te guarda…

Pure tu ‘a guarde…ve guardate.

Zitte tutte e dduje, senza parlà.

Chisà pecchè, però ve capite.

Po tu acala ‘a capa…guarde ‘o riloggio

e te suse dicenno: “S’è fatto tarde,

me n’aggio ‘a jì”. ESSA risponne:

“ E va’! Va’ a fà ‘e fatte tuoje.

Fatte vedè…nun m’abbandunà.”

T’avvicine…’a daje ‘nu vaso…

e ascenno ascenno ‘a salute:

“ ciao MAMMA’! “