Carmine Barretta
Di fronte a tutto quanto ci accade intorno,
può succedere che che si elevi un grido al cielo.
di Carmine Barretta
‘MPÀRAME A PRIA’
“‘Mpàrame a prià, ma fallo ampressa,
aggio bisogno assaje ‘e parlà cu Te!
Pe chesta vita campata troppo ‘e pressa,
me scordo sempe ca Tu sî ‘o Rre d’’e Re.
Pe me nun cerco niente, ‘o vvuo’ capì?
Te dico ‘e te guardà ‘nu poco attuorno.
Quant’ate ‘nnucente ancòra hann’’a murì,
pecchè nun ffaje fernì chistu taluorno.
Muorte a migliare p’’o munno sano:
chi more sparato e chi more affucato.
Chi zomba ‘e n’aria cu ‘na bomma a mmano,
e cchi s’’a cava bbona... rummane mutilato.
Tu ca sî onnisciente e tutto vide,
te sî addurmuto, o t’he scurdato ‘a terra?
‘A ggente continua a ddì: “Vede e pruvvede”...
e quann’è ca viene a fà ‘nu zumpo ‘nterra!
Dice faccio peccato, a ddì chesti pparole?
Ma cu ‘e pparole qua’ male pozzo fà.
E chillo c’accide e ca nun tene còre?
Chillo nun fa peccato... ha dda campà!”.
Nessun commento:
Posta un commento