Marzo
Gennaro Sansone
‘Stu mese ‘e marzo, penso, cierti vvote,
overamente arrassumiglia a te .
Se cagne dint’ a niente, s’arrevota,
chiove e stà ‘o sole, comme faje cu mme !
Tu stammatina stive accussì allera,
e m’ hê 'bracciate e m’ hê jincùte ‘e vase.
Tutt’ ‘o cuntrarie e comme stive ajere,
peggio ‘e ‘na pazza, tutta ‘ntussecosa.
Vedennote felice, aggio penzato,
cumbinazione ! E’ asciuto pure ‘o sole,
sperammo ca durasse ‘na jurnata,
nun dico assaje ma, ‘na jurnata sola !
Doppo poco, jurnata arrevutata,
e comme cagna ‘o tiempo, cagna ‘a scena,
all’improvviso tu te si’ cagnata ,
e i’… ‘n’ ata vota ca… ce pave ‘a pena !
Nessun commento:
Posta un commento