Pagine

venerdì 26 febbraio 2016

Carmen Auletta E BBASTA! 'O CHIANTO

E BBASTA!
E bbasta! Mo m’ ‘a faccio ‘na chiagnuta,
nun voglio fà vedé ca songo forte!
Ogne ghiuorno me ll’aggio trattenuta
ma ogge si me vene nun me ‘mporta!
‘Stu chianto mme l’ha ditto chiaro e ttunno:
“ Chi nun ce vo’ guardà, vutasse ‘a faccia,
me so’ scucciato ‘e dà cunto a 'stu munno,
e ttu, te staje facenno ‘na petaccia!”
Tene raggione, 'o chianto ha ddà sfucà.
Nisciuno po’ ccapì comme me sento
e nnun me voglio manco allamentà...
ma a cchistu chianto, ‘o voglio fà cuntento!
Carmen Auletta


'O CHIANTO
Nun mme dicite niente pe ffavore,
ogge ‘stu chianto se vo’ appresentà!
Mme sta dicenno ch’è arrivata ll’ora
e ‘o spazio suojo mo s’ ‘o vo’ piglià!
Ce ‘a dongo volentieri st’ occasione
pecché mme porta tanta tennerezza
ed è ‘na medicina ca funziona, 
mm’alleggerisce sempe ll’amarezza!
E ppenzo a quanti'amice mm'ànno scritto,
p' 'o bbene ca mme vonno, ‘na parola!”
E ‘na cosa ‘mportante mm’ ànno ditto:
“Nun chiàgnere Carmè ca nun si’ ssola!"
Carmen Auletta









Nessun commento:

Posta un commento