Vincenzo De Bernardo ‘A LUNA IN CORNICE

Vincenzo De Bernardo


‘A LUNA IN CORNICE

Aggia mettere sta luna, int’’a curnice,
pecchè me po’ servì, all’occorrenza,
l’attacco a na parete, dint’’a stanza,
‘a tengo llà, nun se po’ mai sapè!

Si qualche sera ca nun tengo suonno
e m’arravoglio e giro dint’’o lietto,
cu chella specie d’ansia, mmiez’’o pietto…,
embè, cu essa, me posso sfugà!

Pecchè ‘a luna sente e te capisce
e pure si nun parla, nun fa niente,
tanto tu ‘o ssai, chi tace, po’, acconsente,
vuò na risposta? Vo’ dicere: si!

Tieni nu problema ca t’assilla
e nun ne vuò parlà cu qualcheduno?
Nun te preoccupà, llà, ce sta ‘a luna,
nun te tradisce mai, sta llà pe’ te!

8.4.2016
Vincenzo De Bernardo