Salvatore Tolino ‘A penna mia

‘A penna mia
di Salvatore Tolino

Na sera,‘a penna mia, vestuta ‘e luna,
cu ‘a sciarpa ‘nganno e cu nu sciore ‘mpietto,
mentre i’ m’addubbecavo a ppiere ô lietto,
se ne sfujette ‘a mano, verso ll’una.

E se truvaje tra viche e vecarielle
addò ‘ncuntraje ciert’aneme ‘e pezziente,
femmene malamente, mariuncielle,
gente ca crepa tra miserie e stiente.

Sta penna, ca è na penna cuntignosa
e era abituata a scrivere poesie,
penzaje: “Allora è tutto n’ata cosa,
m’hanno mparato a ddicere buscie.

Napule nun è sulo core e ammore,
luce d’argiento dint’’e notte blu!
E, scunfurtata assaje pe stu dulore,
‘a cchella sera, nun scrivette cchiù!!”