‘A regina
Chiena chiena, tonna tonna,
miezz’ ‘o cielo ce stà ‘a luna,
votta ‘a luce dint’ all’onne,
pe’stu mare è na fortuna.
Essa s’arricrea ‘int’ ‘o suio
pecchè ‘o sape ch’è ‘mportante …
quann’ ‘a sera, vène ‘o buio,
l’aspettammo tutte quante.
Quacche vota fa ‘a cummara:
se nasconne, e po’scumpare
reto ‘a nuvula ‘e passaggio,
accussì ‘o ‘nnammorato,
‘int’ ‘o scuro, se ‘ncuraggia,
e ‘ntramente ca s’allumma, .
votta ‘e mmane, aumma aumma …
E’ na luna ‘mpertinente
vo’ stà sempre ‘a tutt’ ‘e pparte,
nun se lassa passa’ niente
e cu ‘a notte, nun fa carte:
vo’ stà sempe ‘nperepicchio
e cummanna pure ‘e stelle:
- Uhè, ‘int’ ‘a capa io v’ o ficco
ca nun site vuie ‘e cchiù belle!
Site tante, proprio assaie,
e io ‘nvece… sulo una,
ma nun vo’ scurdate mai :
‘a regina, ‘e chistu cielo,
arremane sempe ‘a Luna!
Maria Clotilde Cundari
Nessun commento:
Posta un commento