Pagine

sabato 24 ottobre 2015

Fausto Marseglia NU PRUDIGIO

NU PRUDIGIO
È na sera ‘e fuoco dint’ ‘o vico…
Ce sta na calimma senza viento,
p’ ‘a via ‘un se vede nisciuno amico,
manca ll’aria e se riciata a stiento.

‘E pprete pareno carcare aperte
ca lengue ‘e fuoco spanneno p’ ‘a via
e nisciuno resiste a sta allerto
perdenno pure ‘o suonno e ll’alleria.

‘A luntano se sente nu lamiento
‘e na voce ca pare na preghiera,
ca saglie ncielo pure senza viento
e rromp’ ‘o silenzio ‘e chesta sera.

È ‘o canto doce ‘e na nonna nonna
‘e na mamma c’addorme na criatura.
Ma po’ se sente ‘e ‘nvucà ‘a Madonna
cu nu strillo ca esce ‘a dint’ ‘e mmura.

‘A ggente corre dint’ a cchella casa
pe vvedè che sta succedenno:
‘a mamma guarda ‘a criatura e s’ ‘a vasa
pecchè ‘nt’ ‘e bbraccia lle sta murenno.

‘A guagliona cu ‘e premmune appilate
cchiù nun riesce manco a rrispirà.
Oramaje nun l’ è rummaso cchiù sciato
e ‘stu calore nun ‘a fa cchiù ccampà.

Chi se sbatte, chi allucca, chi preca.
Nun dà cchiù segne ‘e vita ‘a criatura.
Po’ succede na cosa ca nun se spieca:
arriv’ aria fresca e se calma ll’arsura.

‘A guagliona finalmente risciata.
‘A mamma c’ ’o pizz’ a rriso è cuntenta.
‘A ggente torna ê ccase sullevata…
felice ca nun è succieso niente.

Ma vede ca 'un ce sta n'alito 'e viento.
E chell’aria fresca chi l’ha mannata?
Ognuno s' 'o ddice mmiez' 'e diente...
Forse… pe nu prudigio s'è salvata…


 (F.M.)




Nessun commento:

Posta un commento