Romano Rizzo Nu figlio pe nu pate

Nu figlio pe nu pate

di Romano Rizzo

Tutt''e vvote ca tu, â casa mia,

ancora si' venuto a me truvà..

a me 'ncuorpo è trasuta n'alleria

ca tutt''e guaje me ll'ha fatto scurdà.

Quanno, 'a vicino, t'aggio visto nfaccia,

nun me songo pututo trattenè...

forte t'aggio astrignuto dint''e braccia

e tanti ccose m'hê cuntato a me.

Tutt''e pparole toje aggio sentuto,

po, tutto 'nzieme, chella felicitò

ca me credevo d'avè già perduto,

addu me ll'aggio vista i' 'e turnà.

Forte t'aggio astrignuto ncopp''o core

'e chistu bene hê ntiso tu 'o calore.

Si' stato tantu tiempo a parte 'e fore

ma si t'abbraccio sento chill'addore

ca forte tu tenive 'a piccerillo

e mo, cu 'o tiempo, certo è svapurato..

a me è bastato sulo nu pucurillo

e, bellu mio, me songo cunzulato !!

Nuje dduje sempe aunite simmo state

e pure quanno tu stive luntano

nu sacco 'e vvote i' me so' sunnato

'e cammenà cu te, a mano a mano.

Figlio mio bello, mo ca si' turnato

e ca t'aggio tenuto 'int'a sti braccia..

pe sta felicità ca tu m'hê dato..

llacreme 'e gioja me scenneno nfaccia.

'A ogge nzieme a te, voglio fà festa

e campà aunite, 'o tiempo ca me resta !!