Pagine

lunedì 7 novembre 2016

Romano Rizzo Guardame ‘nfaccia

Guardame ‘nfaccia
di Romano Rizzo
Guardame, figliu mio, guardame ‘nfaccia,
dimmella tutta quanta ‘a verità..
pecchè nun curre cchiù dint’a sti braccia
comme facive tantu tiempo fa.
I’ t’aggio dato tutto ‘o bbene mio,
cchiù ‘e chesto, no, nun te putevo ddà.
Ê primme tiempe ero pe tte nu dio,
nisciuno a pparo a mme puteva stà.
Po, te si’ fatto gruosso, si’ crisciuto
e te si’ alluntanato sempe ‘e cchiù..
e nun t’’o saccio ddì quann’è venuto
nu tiempo ca nun me parive tu…
Te veco cammenà miezo stunato,
a stiente ce scagnammo nu saluto..
va trova ‘o puosto mio chi ll’ha pigliato..
che t’aggio fatto, ddì che t’è venuto ?
Nun me rispunne, triemme e gguarde ‘nterra
e nnun tiene ‘o curaggio ‘e mme parlà..
Dimme, figliu mio bello, che t’afferra?
penza ca i’ sulo te pozzo aiutà!!
Che dice??..Zitto.. basta cu ‘e pparole..
Comm’è ssuccieso, nn’o voglio sapè..
figliu mio bello, bello comm’’o sole,
mo nun te lasso, sto vvicino a tte…
Stammo abbracciate, figliu mio, accussì
‘e ssufferenze toje voglio spartì,
speranno ca nu juorno, si vvo’ Dio,
tu tuorne comm’a primma, figliu mio.
Chi sa quantu cammino ce sta a ffà,
ma sempe aunite, ‘nzieme aimma luttà,
si dint’a st’uocchie tuoje torna ‘o surriso
me sentarraggio certo mParaviso!!
Sti llacreme che veco ‘nfaccia a tte,
male mme fanno, ma pozzo sperà
ca forze troppo tarde no nun è
e, si Dio vvo’, te putarraje salvà.
T’astregno forte, forte ‘int’a sti braccia,
chesto ca hê ditto.. ll’aggia sapè sulo i’,
sienteme buono, aiza chesta faccia,
a mamma toja, chesto.. nun ce ll’hê ‘a ddì.
Mamma, tu ‘o ssaje, è assaje malata ‘e core,
si have na botta ‘e chesta, se nne more.
Stu pisemo sulo i’ ll’aggia purtà,
si no è ffernuto ca songo papà!!




Nessun commento:

Posta un commento