O ‘suonno d’ammore
Nun me vulesse cchiù scetà da chistu suonno
è nu suonno ca’ se fa cull’uocchie apierte.
Tu pienze ‘e durmì ‘nvece nun duorme
nun tiene né cuscino né cuperte
E’ ‘o suonno dell’ammore, è nata storia,
te stupetea quanno te colpisce
e tienatill’a mente int’ ‘a memoria
te fa sbarià e po’ te scimunisce.
Praticamente è comm’ anestesia
ca’ piglia e nun te fa sentì dulore,
eppure crideme, ca’ sta frennesia
è comm’è ‘a lama ca’ te squarta ‘o core.
Te piglia e nun ne vò sapé raggione
te sbatte ‘n pietto comm’e martellate
te chiure ‘o core dint ‘a ‘na priggione
ma senza sbarre e senza cancellate.
L’oucchie te chiude
e te fa spassà cu ‘a capa
t’arravoglia senza ‘na mesura,
stai scetato ma l’uocchie nun l’arape.
Che bella cosa stu suonno d’ammore,
spera ca te succede tutt’e juorne
e quanno te culpisce ‘mpiett’o core
vire ‘e nun te scetà,
e finchè puoi, tu, duorme!
Maria Clotilde Cundari
Nessun commento:
Posta un commento