Gennaro Sansone ‘O TIEMPO

‘O TIEMPO

di Gennaro Sansone

‘O tiempo cumme è strano,

comme te cagne ‘e cose… 

Quanno tu si’ guaglione,

so’ tutte sciure e rose.

Si chino d’alleria,

e te faje mille suonne,

nun dice maje bucie,

vuo’ tantu bene ‘e nonne.

Mammà e papà te cureno

e campano pe’ te.

Pe’ te ‘e tutte se priveno,

pe’ loro si’ nu rre .

Po’, passa ‘o tiempo, e chiano,

tu piglie ‘a strata toja.

Te truove na guagliona,

felice tutte e dduje .

‘E vvote pienze… ‘o tiempo… !

Mo’ stive ‘int’ a nu banco,

ma, è proprio comme ‘o lampo,

… tiene ‘e capille ianche.

Passene ‘e mise, l’anne,

pazzianno cu ‘e nepute,

mentre tu staje scennenno,

loro, ‘ncopp’ ‘a sagliuta .

‘E figlie so’ distante,

e siente po’ ca ‘nciuceno :

“ Papà comme è scucciante ! “

E, l’uocchie tuoje… ca luceno...

" Nun le va niente buono ! "

" Va buò, ce vo' pacienza ! "

Parlene 'int' 'a cucina.

E… che dulure ‘e panza…

Ma ‘e cose assaje nun dureno,

e se cagne ‘o cupione…

So’ loro ca te cureno,

tu, viecchio… faje ‘o ‘uaglione !

Co’ tiempo tutte cagne,

se scenne e nun se saglie !

“ Papà… che d’è, tu chiagne ? “

“ …So’… ‘e llente… no, te sbaglie…! “