Romano Rizzo
Parole
Parole ca mm’ero scurdato,
â sera me veneno a mmente
e mo ca sto sulo cchiù spisso
succede che st’anema ‘e sente.
M’addono che ‘a vita è passata,
e i’ stevo sunnanno e speranno,
currenno appriesso a nu suonno,
felice, redenno e pazzianno..
Pe cchesto ‘e pparole che sento
me fanno ogni vota cchiù male;
sanà nun se po’ sta ferita
si ‘ncoppa ce metto stu sale.
Si tutte sti suonne d’ammore
vulate so’ nzieme c’’o viento,
mo vaco cercanno ‘o silenzio..
nun voglio cchiù sentere niente!!
Nessun commento:
Posta un commento