‘E meglio parole
Comme so’ strane ‘e pparole,
cagnane quanno e comme ‘e ddice,
tanno te ponno da’ tanto dulore
tanno te ponno fa’ tanto felice.
Si dice - Io t’amo – a quaccheduno
tu vire po’, ca nun è sempe ‘o stesso,
a vvote regne ‘e gioia ‘o core ‘e uno,
a vvote ‘nvece te pigliene pe’ fesso …
‘O stisso si tu dice – Io te lasso -,
ce sta chi se dispera e chiagnarria
e chi, chinanno ll’uocchie e a’ faccia abbascio,
te murmurea: - uhé … lass’ ‘a fa’ a DDio! -
Sta vita è ‘na cummedia senza trame
cagne ogni vota ‘a scena e ‘e persunagge:
ce sta chi parla bbuono e po’ fa ‘o‘nfame,
chi se fotte ‘e paura e parla ‘e curaggio …
‘A cosa meglio ‘a fà, p’ognuno ‘e nuje,
è chella ‘e stà a posto c’ ‘a cuscienza,
perciò, ognuno sceglie a modo sujo
chello ca fa e ca dice ‘e cunseguenza.
Po’ chi vo’ capì, capisce comme vuole,
e comme vo’, risponne ‘e compiacenza.
Si po’ nun vuo’ sbaglià, pe’ nun fà ‘mpacchio
‘o saje tu, quali so’ ‘e meglio pparole?
So’ chelle ca se diceno cu ll’uocchie
fanno capì sempe chello ca pienza ‘o core!
Nessun commento:
Posta un commento