‘A LETTERINA ‘E NATALE
Mancava ‘nu mese pe Natale,
e i’ ggià penzavo â letterina.
Mammà: “Me faje fà ‘o spezziale…
E ‘a stessa storia, ògne matina”.
Nun capevo pecchè m’arrunzava:
i’ vulevo scrivere sulo ‘a letterina.
‘Na manèra o n’ata, m’arrangiavo…
E ppapà ‘a truvava sott’ô piattino.
Scritta ncopp’a ‘nu foglio ‘e quaterno:
‘na scrittura ‘e criaturo ‘e sette anne.
Addò prumettevo ‘nu bbene eterno…
Ll’avucurio ca campasseno cient’anne!
Dicevo: “ ‘A ogge in poi ve prumetto,
ca nun ve faccio arraggià cchiù”.
Ero ‘nu stuppagliuso, i’ ll’ammetto…
M’arrubbavo sempe ‘a sarza d’’o rraù!
Mentre liggevo me veneva ‘a cchiagnere,
ll’avevo scritto i’, ‘a letterina.
Papà mme diceva: “Nun chiagnere…
Aggio capito ca nun faje âmmuina”.
Quanno nce penzo, ve vulesse ccà:
tutt’’e juorne ve vulesse fà arraggià…
Sì, me mancate, bbene mio carnale…
…Turnate e ppurtateme ‘e Natale!
Carmine Barretta
Nessun commento:
Posta un commento