Carmine Barretta TU SÎ ‘O PAGLIACCIO

Carmine Barretta

Si dice che nella vita reale,

convivono con una latente 

tristezza…io ci credo.

di Carmine Barretta

TU SÎ ‘O PAGLIACCIO

Cipria, russetto… parrucca, 

…e ‘nu naso a puparuolo.

Cagne faccia, po te trucche,

accussì trase dint’ô ruolo.

Tu sî nnato pe fa’ ridere,

sî ‘o spasso ‘e tanta ggente.

‘Ncopp’ê ttavule ògne ssera…

Sî ‘o pagliaccio sulamente.

‘A meraviglia ‘e ‘na criatura,

quanno faje ‘o juoco ‘e prestigio.

Pure ‘o mimo ‘nfacci’ô muro…

Addeventa ‘nu prodigio.

E ‘o spettacolo va annante,

p’’e semmane, ‘e mise, ll’anne.

Tu sî nnato teatrante…

P’allevià pène…e malanne!

T’arretire sempe tarde,

maje te vulisse arretirà.

Te strucche, po te guarde…

…‘o specchio dice ‘a verità!

Esce fora tutt’’a faccia,

chella ca nisciuno sape.

Vide n’ommo e no ‘o pagliaccio…

E pe vedè…nisciuno pava.

E accussì passano ‘e juorne:

sempe arreto a ‘nu sipario.

Sî ‘o pagliaccio senza scuorno…

Sî ‘a ricchezza ‘e ll’impresario.

Mentre saglie ‘nfaccia â croce,

dint’ê rrecchie ‘a stessa voce:

“…’O spettacolo è accumminciato…

‘A ggente vo’ ridere…hanno pavato!”