Gennaro Enza Picone 'A CCHIU' BELLA POESIA

'A CCHIU' BELLA POESIA

Da uso 'e ragione,

sentenne 'e ccanzone,

puisie, frase d'ammore

quante emozione int'o core,

ca nun capevo a ccausa 'e ll'età.

E po ll'accumminciaie a ccantà.

Accussì accumminciae 'a sstoria mia.

Pigliaie 'a penna e screvette pur'je.

Canzone, puisie, frase d'ammore,

comm'a frutta nascevano int'o core.

Ma ce mancava sempre qualche ccosa, 

ca nun eve 'o bbene o 'o lietto 'e rose.

Avrìa vuluto scrivere

a' femmena cchiù bella ca po esistere,

chella ca t'appice c'o ffuoco 'e nu vulcano,

eppure t'è vicina co core suoje int'e mmane.

Doppe tant'anne, fernuta 'a giuventù,

int' a sta vita si accumparuta tu.

Tu bbuono nun 'ossaje, mo t'o ddico je.

Pe mme si tutto, si 'a vera puisia.

Riesce a parlà cu ll'anema mia.

E guardanneme int'a ll'uocchie nun si na buscìa.

Si tutta chella ca vulevo ncuntrà,

ca int'a sta vita puorte felicità.

Niente succede pe ccaso int'a sta vita,

cu tte capisco ched'è l'eternità.

Tu si a cchiù belle d'e ppuisie screvute,

si 'o regalo cchiù bello c'aggio avuto.

Scetanneme 'o penziero mie si ttu,

e sento mpietto 'e nascere ancora 'a ggiuventù!

Versi di Gennaro Enza Picone