ANTONIO RUGGIERO TESTAMENTO POETICO

TESTAMENTO POETICO

Nun songo suscettibile v’’o ggiuro,

so’ riflessivo,osservo e pparlo chiaro;

sarraggio diffidente pe’ nnatura,

ma io scengo ‘nfunno comm’’o palummaro.

Io quanno scrivo parto d’’o ccuncreto,

ma quanno sento ‘e dì’ cuntinuamente…

“Che bbella fantasìa tène ‘o pueta.”

Me sento quase ‘e sfottere d’’a ggente.

“E bbravo ‘o pueta, comme scrive bbello!

Che bbella capa, ma comme facite?”

Me fanno sentì’ quase nu zimbello,

ma io so’ nu figlio ‘e ‘ntrocchia, e mme sapite.

Io ve capisco primma ca parlate

e cchello ca dicite aret’’e spalle;

ma ‘stu cuncetto vuosto è ccomm’’o sciato

ca a ffuria ‘e me sciuscià, m’abboffa ‘e ppalle!

ANTONIO RUGGIERO 18/9/2011