ANTONIO RUGGIERO SURRISO ‘E MAMMA

Non c'è niente di più bello e luminoso del sorriso d'una mamma.

SURRISO ‘E MAMMA

Ch’ addore mamma-ma’ dint’’a cucina,

addò pippéa dint’ a ‘na caccavella,

‘a sarza ca cummoglie ‘o spezzatino

e addò mammà nce affonna ‘a cucchiarella.

S’ è ffatta vicchiarella mamma mia,

ma ‘o tiempo ll’ è sciuliato ‘ncopp’’a pella;

nun ha lasciato rughe o che sacc’ io,

e ttène ancora ‘a faccia liscia e bbella.

A ffianco ‘a caccavella,’a cafettèra,

primma se ‘nfòca e ddoppo murmuléa;

mammà cu’’a faccia ‘e Pasca e ssempe allèra,

me dice ca sta bbona e ccapuzzéa.

A stiente se mantène ‘ncopp’’e ggamme,

smorza ‘o dulore e sse mantène dritta;

è cchello ca te fa ‘na vera mamma…

annanze ‘e figlie soffre e sse sta zitta.

E qquanno po’ me piglia ‘a tennerezza,

m’’a stregno dint’’e bbracce e ppo’ m’’a vaso;

ll’ abbasta accussì ppoco, e pp’’a priezza,

cu’ nu surriso suoio s’ allumma ‘a casa.

17/6/2004 ANTONIO RUGGIERO