ANTONIO RUGGIERO SAPUNARO...RROBBA VECCHIA!

La figura del rigattiere è quasi scomparsa, ma uno di questi io l'ho immaginato così. Leggete e se vi piace commentate e condividete, grazie a tutti per l'attenzione e l'interesse per la mia poesia.

SAPUNARO...RROBBA VECCHIA!

Jamme meh, ca sto ppassanno,
bella gge’ appizzate ‘e rrecchie,
so’ ssemp’io, songo Giuvanno...
Sapunaro...Rrobba vecchia!

Io nun cerco stracce e ppezze,
nun ‘o ffacio pe’ mmiseria;
io v’’o ppavo a ccaru prezzo...
Cerco rrobba assaje cchiù sseria.

‘Na divisa ‘e Generale,
‘na testata nucleare,
chesta rrobba ca nun vale...
Datancelle ‘o sapunaro.

Si tenite nu cannone
o ‘na bbomma pe’ scuppià’.
Nu pulitico ‘mbruglione?
Bella gge’ , mettite ccà.

Io ve ggiuro e vve prumetto
cu pparola ‘e sapunaro,
ca ‘sta chiaveca ‘e carretta,
io dimane ‘a votto a mmare.

Jamme meh, facite ampressa,
chesta rrobba, ‘stu squallore;
bella gge’, quante so’ ffesso...
Io v’’o ppavo cu nu sciore.

ANTONIO RUGGIERO 28/10/1987