Giulio Mendozza Notte ‘e suonno

Notte ‘e suonno

di Giulio Mendozza

Na varca ‘e piscature

s’’a vasa ‘argiento ‘e luna ;

na pàtina ‘e culure

‘ncopp’a nu mare blu.

Stanotte sto affacciato

a stu balcone ‘ncielo,

me sento cunnuliato

d’’a brezza ca mo va,

smove ‘o prufumo ‘e ll’onne,

‘o spanne dint’a ll’aria

e ‘st’anema se ‘nfonne

‘e suonne ‘e giuventù.

Tiennere so’ ‘e ricorde,

so’ triste e songo doce,

d’’o core tutt’’e ccorde

mo tornano a tremmà.

Nun dormo, sto scetato

e pure pare suonno :

stu munno affatturato..

me piace comm’a che .

Sento nu canto amico

ca struje e ca cunzola,

nu canto nuovo e antico

ca attira e fa ‘ncantà.

Ma fossero ‘e Ssirene

ca chiammano chi passa

p’’o stregnere ‘ncatene

senza n’avè pietà ?