‘E SUONNE
‘E suonne,ma che sso’,songo penziere,
nun so’ ppesante comm’’e ppalle ‘e chiummo;
nun teneno sustanza, so’ lliggiere,
saglieno ‘ncielo comme saglie ‘o fummo.
Io m’addimanno n’omme che ssarrìa
senza ‘o sustegno nobbele d’’e suonne;
nu cieco ca va spierto ‘mmiez’’a via,
nu ramusciello sicco e ssenza fronne.
Nu puveriello ca penza a ddimane,
ca si se mette sulo a suspirà,
pure si astregne ll’aria dint’’e mmane,
se sente già cchiù rricco ‘e nu Pascià.
Qual’atu scopo, ma qualu mutivo,
mòve ‘stu munno, chesta specie ‘e palla,
addò sulo chi sonna è ancora vivo,
sulo chi sonna resta ancora a ggalla.
Sarrà forze nu suonno ‘a vita nosta?
Sarrà forze nu suonno ll’ al di là?
Io ll’addimanno ‘e stelle e ppe’ rrisposta,
tutt’une, ‘e bbotto, tornano a bbrillà.
17--05--1989 ANTONIO RUGGIERO
