Romano Rizzo Felicità

Felicità

di Romano Rizzo

Felicità è scetarse ogne matina

e vedè a te ca duorme a mme vicina;

è sentì ‘int’a stu core n’allerezza

mentre te do nu vaso e na carezza.

Felicità è vedè ‘int’a ll’uocchie tuoje

‘o bbene ca ogge ancora tu me vuoje

appena ca t’astregno forte a mme

mentre stu core sbatte comm’a che.

Felicità è turnà ogne sera â casa,

addò m’aspiette tu e me daje nu vaso,

e leggere, astrignennete dint’’e bbraccia

ca ancora me vuò bbene, ‘ncopp’â faccia.

Felicità è pazzià ‘nzieme cu te

c’o core ca è felice cchiù ‘e nu rre;

felicità è putè sempe penzà

ca tu ‘nzieme a mme sempe vuò stà.

Pecchè tu sola a ‘o core mio saje dà,

‘o bbene e ‘a pace cu ‘a felicità !!