Malincunia ‘e Natale
di Vincenzo Giandomenico
I’ te ringrazio Dio che aggio campato
e sento n’ata vota ‘addore ‘e pigne.
Natale..Pare ajere..già è turnato;
vaco a piglià ‘e pasture int’’o suppigno.
Se so’ ngiallute ‘e ccarte ‘e sti giurnale
ca i’ sgravoglio attuorno a sti pasture;
quanta ricorde tornano a Natale
mo ca sti figlie nun so’ cchiù criature.
Quanno ‘e tenevo tutte piccerille,
attuorno a stu presebbio che ammuina!
“ Papà, se more ‘e friddo ‘o Bammeniello,
miettece ‘o ciucciariello cchiù vicino!”
‘A quanno lloro se so’ alluntanate
‘o friddo ‘ncuollo ‘o tene mo papà,
so’ i’ ca tremmo ‘e friddo senza sciato,
‘o sciato lloro ca mme po’ scarfà.
E mo, â vigilia, ‘mpunto mezanotte,
cca stongo sulo cu ‘a cumpagna mia,
guardanno ‘o Bammeniello sott’a rotta,
chiagnenno ce facimmo cumpagnia,
guardammo ‘a dint’’e llastre d’’a fenesta
ca sciocca ‘a neve ‘argiento d’’e biancale.
Overo è triste chiagnere a na festa…
ma è assaje cchiù triste chiagnere a Natale!!
Nessun commento:
Posta un commento