MMIEZ’’E STELLE
Diceno ca mammà sta mmiez’’e stelle,
murette proprio quando io songo nata,
io, mò. a na stella, me songo afferrata,
vaco p’’o cielo, ca l’aggia parlà!
Le voglio dumandà qual è ‘o mutivo,
ca se n’è ghiuta e, sola, m’ha lasciata,
voglio sapè pecchè m’ha abbandonata,
pure se sto bene cu papà!
Tutt’’e cumpagne mie, for’’a scola,
teneno ‘e mamme a l’accuncià ‘o nastrino,
sistemeno ‘o grembiule, ‘o panierino,
invece, io tengo ‘a nonna, ma pecchè?
E, po’, tengo nu desiderio gruosso,
nun me dicite ca so’ na monella,
diceno: l’assomiglio…, ca so’ bella,
na vota sola ‘a vulesse vedè!
Forse nun è stata colpa soia,
ognuno ‘e nuje tene nu destino,
però, na vota sola…, n’abbraccino…,
pe’ tutt’’a vita, m’’o faccio abbastà!
Vincenzo De Bernardo
Nessun commento:
Posta un commento