Gennaro Sansone ‘E ricorde

‘E ricorde

Di Gennaro Sansone

Diceno ca cchiù ‘o tiempo passa e cchiù ,
ricorde e nustalgia nun fanno male,
ma chesta, p’ ‘e ricorde ‘e giuventù,
p’ ‘ o primmo ammore, credo ca nun vale.

Pe’ tutta ‘a vita ‘o puorto dinte ‘e vvene .
Comme se po’ scurdà d’ ‘o primmo vaso,
‘e primme suonne, e chi ‘e vuluto bene ,
comme t’ ‘e può scurdà tutte ‘sti cose ?

Resate sott’ ‘o chiovere, abbracciate,
‘o scuro ‘e ‘nu purtone, forte forte,
’o vero ammore nun è maje peccato,
prumesse e giuramente nfino â morte .

‘O sole, ‘o mare e tu sempe cchiù bella,
stà tutto annascunnuto dint’ ‘o core,
quanta felicità cu ‘a luna , ‘e stelle,
comme te può scurdà d’ ‘o primmo ammore !

Ricorde viecchie , ma pecchè, va trova,
quanno ce pienze, ancora nun te pare,
ca so’ passate l’anne e sempe è nova
‘sta nustalgia e ‘stu sapore amare…