Vincenzo De Bernardo ‘A primma vota

‘a primma vota, quando te ncuntraie,

nun saccio tu ma io nun m’’a scordo mai,

pure vulenno…ma comme se fa!

‘O primmo incontro, quatte passe a pere,

dint’’e giardinette, mmiez’’a piazza,

‘o core mio ca, già, faceva ‘o pazzo,

nemmeno si s’’o stesse a immaginà!

Po’, quatte gocce d’acqua e tu diciste:

-“ Che dici…, ce fermammo o ce nfunnimmo?”-

Io ruspunnette: “ ‘O ‘mbrello, nuje, ‘o tenimmo…”-

E tu: “ E’ meglio a ce arreparà!”-

E, po’, fu complice, chill’archetiello…,

ca nun ce fu bisogno ‘e na parola,

comme a nu film, annanze c’’a moviola,

‘a scena, m’’a ricordo, chesta ccà:

‘o tiempo, appena, ‘e vuttà ‘o ‘mbrello, nterra,

na mano m’’a mettiste, int’’e capille,

Madonna…, si ce penso, do’ nu strillo…,

nu bacio, luongo, fu n’eternità!

E nun chiuvette cchiù, all’improvviso,

nuje ce staccaieme, pe’ piglià fiato,

poi, all’unisono, na gran risata

e stettemo, n’ata vota a ce abbraccià!

5.12.2015

Vincenzo De Bernardo