'A RETO Â FENESTA
'A reto a 'sta fenesta faccio 'a spia,
m'aggio 'mparato ll'ora ca tu passe,
ca mm'ha pigliata chesta frennesìa
'e te guardà 'ntramente vaje a spasso.
Tu nun me parle cchiù senza mutivo,
e ssi te chiammo, tu m'avuote 'a faccia.
Te pienze mo ca senza 'e te i' nu' vvivo?
'Sti llettere oramaje so' ccartastraccia!
Ma che t' hê mise 'ncapa , che te cride,
ca mo, pe tte i' me taglio pure 'e vvene?
L'hê fatto malamente 'o cunto, 'o vvide
ca stongo meglio senza 'e te e 'sti ppene?
E ttutte 'e juorne 'a reto a 'sta fenesta
m'apposto e m'annasconno pe guardà,
ll'orgoglio tengo e ffaccio mo 'a maesta,
ma sto' suffrenno pe nun te penzà!
Carmen Auletta
Nessun commento:
Posta un commento