ANTONIO RUGGIERO PRUFILO ‘E FEMMENA

PRUFILO ‘E FEMMENA

Cu’ nu scalpiello ascesse ‘a ‘int’ a ‘na preta,

cu’ nu penniello ‘a ‘int’’e culure chiare;

siccomme io scrivo vierze e sso’ ppueta,

‘sta femmena ‘int’’e suonne m’accumpare.

‘A veco cumbattiva e dignitosa,

nun se lamenta e spisso astregne ‘e diente;

ma vuje v’’a ‘mmagginate a ‘na picciosa?

Pe’ n’omme sarrìa sulo nu turmiento.

‘A veco ca cammina e ‘mposta ‘o pietto,

e sse distingue mmiezz’ a ttanta folla;

ma po’ nce sta chi pure dint’’o lietto,

è accussì mmoscia ch’è nu cat’’e colla.

‘Sta femmena ca tène tanta forza,

ca spisso m’ accumpare bbell’ e bbuono;

si pure affronta ‘a vita e ‘a piglia a mmorze,

quanno vo’ bbene a n’ omme è nu ciclone.

 ANTONIO RUGGIERO