‘A PAROLA ‘E PULECENELLA ANTONIO RUGGIERO

Tempo fa si diceva che Pulcinella era morto, 

ed io risposi con questa poesia. Leggete...

‘A PAROLA ‘E PULECENELLA

Diceno ca so’ muorto, nun è overo!

Nun date audienza ‘e cchiacchiere, sto ccà;

‘sta maschera se fa sempe cchiù nnera,

se tegne cu’ ‘e culure ‘e ‘sta città.

Io stongo ccà,sto ddint’ a ttutt’’e viche,

sto ddint’ a ll’uocchie ‘e chi surride e cchiagne;

io songo ‘o pate,’o frate,so’ ll’amico,

so’ cchillo ca ‘stu populo accumpagna.

So’ cchillu llà ca s’annasconne ‘a faccia

pe’ ccummiglià chist’uocchie russe russe,

so’ cchillo ca ve stregne dint’’e bbraccia,

chillo ca chiagne sturzellanno ‘o musso.

Pulecenella,no, nun v’abbandona,

nun se permette, nun v’’o fa ‘stu tuorto,

pecché chist’omme cu’ ‘stu cuppolone,

‘nfi a cché Napule campa, nun è muorto!

20--04--1985 ANTONIO RUGGIERO