‘O carnevale d’ ‘a vita
Ogni anno, ‘e chisti tiempi, ce ‘sta’ ‘a festa
fatte cu’ ‘e maschere curiandoli e dolcetti,
ogni creatura se mett’ ‘ncuollo ‘a vesta
pe’ se maschera’ e fa’ scherzetti.
Nun sulo ‘e piccerilli fanno chesto,
pure ‘e gruossi vonno festeggia’,
dicimmo ca pe’ tutti è nu pretesto
pe’ se magna’ ‘e dolci e pe’ paria’!
‘Nfaccia basta na maschera qualunque
‘nsieme a nu naso finto e nu cappello,
e già ‘o fatto ca uno s’annascunne,
pare ca ‘o iuoco addiventa assaie cchiù bello !
Ma ‘o ssaie a cosa sto pensanno? …
A tutte ‘ste persune – e quante ce ne stanno –
ca ‘a fore ‘o Carnavale,
teneno ‘ncoppa ‘a faccia, na maschera speciale,
fatta ‘e nu materiale can nun se scassa maie …
‘e che culore sia tu, nunn ‘o saie
pecché ‘o cagnano a cumanno
a seconda l’esigenza ‘e ciò che fanno,
e crereno ca nun se fanno male
vivenno annascuse arete a chist’ ‘nganno.
E ‘sti persone favese e sleale
e tutta chesta ggente ca nun vale,
hann’ ‘a sape’, si ancora nunn ‘o sanno,
ca primma o poi … fernesce ‘o Carnevale!
Maria Clotilde Cundari
Nessun commento:
Posta un commento