Maria e Ggiesù
E Mmaria, se téne strint’ô core
’stu piccerillo bello comm’ô sole,
’stu Figlio Bbenneditto d’ ’o Signore,
cu na ggioja ca nun téne parole.
Na capuzzella d’oro, peccerella,
c’ ’a puteva tené mparma de mana,
’a vucchella mpustata a na resella
mentre, ’int’a ll’uocchie, ’a luna, ruffïana,
lle mannava na luce ârgiento fino
ch’ ’e ffaceva brillà comm’a ddoje stelle ...
Ma comm’è bbello ’stu Ggiesù Bbammino!
Maria s’ ’o guarda ... e ’o vasa ncopp’â pelle ...
’o vasa mpietto, propio ncopp’ô core,
comm’a vvulé sanà chella ferita
che, ttrent’anne cchiù ttarde, (che ddulore!)
pe ttroppo ammore, ll’êva luvà ’a vita.
Nessun commento:
Posta un commento