Romano Rizzo Sta lettera

Sta lettera
di Romano Rizzo

Tutt’’e suspire ‘e st’anema
cu ‘e parpete ‘e stu core,
‘e truove int’a sta lettera
che mo t’ha scritto ammore.

A mme m’hê fatto ntennere
che ‘a vita po’ cagnà
e che ‘a rota d’’o tiempo
arreto po’ girà !!

Ll’hê fatto turnà giovane
n’ata vota stu core
che sta currenno appriesso
a nu suonno d’ammore.

Tu, ca hê purtato ‘o sole
addò ce steva ‘o gelo,
e ddoce faje ‘e pparole,
si’ n’angelo d’’o cielo.

Si’ ll’acqua ncopp’ô ffuoco,
tu si’ na calamita;
tu ca si’ nu tesoro
a mme m’he dato ‘a vita.

Te cerco sulamente
‘e stà vicino a mme
e nun voglio cchiù nniente
già me ssento nu rre!!

Llieggete chesta lettera..
lliggiatella ogne sera..
tienela bbuono a mmente :
chist’è ll’ammore ovèro..

ll’ammore ca nun cerca
e ttutto è ppronto a ddà;
s’attacca comm’a ll’ellera
e mmaje te vo’ llassà!!