Chistu silenzio
’O tiempo ch’è ppassato
t’ha sulo accarezzato
e bbella comm’a ssempe, t’ha lassato ...
e io te sto guardanno
mentre tu staje cusenno
e ’a sera, a ppoco a ppoco,
va murenno ...
tra nuje, mo, nun ce stanno cchiù pparole
e ’stu silenzio ... quanto mme fa male ...
Che vvoglia ’e di’:
“Te voglio ancora bbene”
che ddesiderio tengo ’e t’abbraccià,
che vvoglia ’e te vasà chisti capille,
comme vulesse ll’uocchie tuoje ncuntrà!
Ma ’stu silenzio, ’o vvi’,
è comm’a nu muro,
comm’a nu muro grande, mmiez’a nnuje,
e ’o cielo mo se fa sempe cchiù scuro
e nnun trovo ’o curaggio ’e te parlà ...
Ma comme, comm’è stato
ch’âmmore s’è pperduto
si nzieme tantu tiempo
âmmo sunnato,
forze nun ll’hê capito
st’ammore mio sbagliato,
forze ’stu core mio
nun s’è spiecato ...
ma io te voglio bbene cchiù ’e na vota,
nun sap’ ’e niente, senza ’e te, ’sta vita ...
Che vvoglia ’e di’:
“Te voglio ancora bbene”
che ddesiderio tengo ’e t’abbraccià,
che vvoglia ’e te vasà chisti capille,
comme vulesse ll’uocchie tuoje ncuntrà!
Ma ’stu silenzio, ’o vvi’,
è comm’a nu muro,
comm’a nu muro grande, mmiez’a nnuje,
e ’o cielo mo se fa sempe cchiù scuro
e nnun trovo ’o curaggio ’e te parlà ...
Nessun commento:
Posta un commento