25 aprile 2009 ·
NUN TENEVA TRENTANNE (me metto appaura) di Bruno Zapparrata Ed. del delfino anno 1986
Sò trasuto int''e viche, stasera,
addo' tutto me parla d'aiere,
m'arricordo na vota comm'era,
quanno 'a ggente campava sincera.
Sto cercanno pe mmiezo a sti ccase
chillo ammore 'e quanno ero guaglione,
ma è nu suonno, so' mute mo 'e ccase,
so' nzerrate feneste e balcune.
Cammenanno p''a via d''a Cuncordia,
sotto a' n'annèto, strutto d''o tiempo,
scamazzato 'a migliare 'e ricorde,
steva on Ciro, cchiù viecchio d''o viento...
E cchiù annanze, Nannina d''a neve,
(ca venneva 'e ggranite 'e limone),
me fettiaie, facette na cera,
tale e quale a quann'ero guaglione.
Po' dicette: mo site duttore?
ma Maria, 'a sapite a Mmaria ?
nun teneva trent'anne Maria...
mo sta ncielo cu ll'angele 'e Dio !
Stò fuienno e nun veco cchiù 'e viche,
scioscia 'o viento e fa gelide 'e mmura,
straccio e sperdo 'e ricorde cchiù antiche,
scioscia 'a morte e me metto appaura !
BRUNO ZAPPARRATA
Me si turnata n'ata vota nzuonno
cu ll'uocchie 'e chianto e na faccella appesa,
cercanno 'e te parlà, nun m'esce 'a voce
e me sto' zitto e po'... m'abbraccio 'a croce.
So' già trent'anne ca vulaste ncielo,
'o mese 'e maggio, chillo d''a Madonna,
t'accumpagnaie nu viento fine e doce
cu addore 'e sciure d'angelo e d''e rrose...
Dimme pecchè tu chiagne mamma mia,
forze p''a sciorta nera ca me tene
arravugliato int''a na morza acciaro
o pecchè nun 'o ssaccio che d'è 'o bbene...
''E ppene meie t''e cconto tutt''e juorne,
nnanz''o ritratto tuoio, ncopp''o cummò,
certo, pirciò tu chiagne dint''e suonne,
pecchè nun puo' fa' niente, è overo o no?
Acconcio stu ritratto mmiezo 'e sciure,
ll'ombra 'e nu vaso e po'... me faccio 'a croce,
restanno a penzà a te cu ll'aria scura,
ma nun me lagno cchiù... pe te da' 'a pace...
Duorme Mammà, Duorme...
Bruno Zapparrata
E M'ACCAREZZA NFRONTE
di Bruno Zapparrata SIAE 88488
Pare ca na Sirena sta cantanno,
sotto a nu manto blu,luceno 'e stelle,
stu specchio 'e mare s'è pittato argiento,
na varca, na scugliera e sulo viento.
Suono 'e chitarra, s'arreposa l'onna,
'o viento mo s'appicceca cu 'e ffronne,
quanta lampare, fanno luce a mmare
tornano ll'ombre addò l'acqua è cchiù chiara...
..........
Sonna Miseno, sonna....
sott'a muntagna 'e Proceda into vierno,
quanno sulo, sfrunnato è ll'oleandro
e ll'onna calma già accarezza arena...
Notte int''a notte e ghiurno senza juorno,
tiempo scagnato e cennere sperduta,
sentì na voce a chi non tene voce,
vedè na luce addò non ce sta luce...
E ll'onna torna, musica ch' accorda
scetanno ncapa a mme mille ricorde,
d''o mare, d''e ssirene e d''e tramonte...
Cade na stella e m'accarezza nfronte......
Bruno Zapparrata
Diritti riservati a norma di legge. Siae 88488
MARE
Pare na musica ca va e che vene,
nfaccia a sti scoglie, canto 'e sirena,
l'onna ngrifata accartoccia e se sbatte
pitta sti prete, d'argiento, antrasatta.
Lassa n'addore chest'aria marina
ca m'accarezza tanto ca è fina,
tramonto 'e sole chiano scumpare,
mentre s'appicciano 'e primme lampare...
Mare 'e sta terra, na terra ncantata,
c'abbraccia 'e llacreme e chi l'ha lassata
e sott' arena annasconne 'e segrete
tenennole astrinte sotto a sti pprete...
Quanti passione se songo appicciate
e quant'ammore se songo stutate,
so mille vele ca vanno c''o viento
nfose d''o sole, p''o mare d'argiento...
E chisto è 'o mare d''e nnammurate
'e Margellina, 'e ll'uocchie affatate,
tramonto e nnuvole, canto 'e Sirene,
canto d'ammore ca va e ca vene...
Sona chitarra, vola luntana,
puortale 'e llacreme e 'o chianto d' ammore,
puortale 'e suonne sunnate 'a na stella,
puortale 'a voce d''o mare e d''o core!
Bruno Zapparrata
Diritti Riservati Siae 88488
Stupende, Amazing.. grande Anna Parascandola.
RispondiEliminaGrazie alla grande amica competentissima Anna Parascandolo la quale mi onora della sua amicizia e benevolenza.. Alcune delle mie poesie pubblicate ultimamente.
RispondiEliminasei un'amica meravigliosa Grazie da Bruno Zapparrata.
RispondiElimina