Vernata napulitana
Nazario Bruno
Legge
Catello Trocciola
Cammino chiano e gguardo chistu mare
ca nziem’ô cielo griggio se cunfonne;
s’ammescano penziere doce e amare
abbutechianno comme fanno ll’onne.
Respira ’o viento, dint’ô Gurfo antico
’e ’sta Città che mm’ha visto guaglione,
me parla comme po pparlà n’amico;
cantaddint’a ’o mutivo triste ’e na canzone.
E ll’aria volano ’e pparole
comme palomme ca vanno varzianno
e pparlano ’e nu cielo senza sole
e ’e tutto ’o tiempo ca mo va passanno.
E i’ me guardo ’e strate ’e ’sta cullina,
me guardo ’e ccase, ncoppa arrampecate,
pure si è scuro ’o cielo, stammatina,
so’ ssempe bbelle ’e ccose; so’ ncantate.
Forze è ’stu core mio chino ’e tristezza
ca me fa sta’ scuntento e appecundruto;
comm’è lluntana chella ggiuvinezza,
comm’è vvicino ll’urdemo saluto!
’O vierno passarrà ... e ’a primmavera
farrà ancora azzurro ’o cielo e ’o mare;
ma a mme s’è ffatta ormaje pe ssempe sera
e sto pperdenno tutt’ ’e ccose care.
E mme cunforta sulo nu penziero:
quanno ’stu cielo cchiù nun vedarraggio,
’e n’atu sole, ardentemente io spero,
ca ll’uocchie tuoje m’astiparranno 'e ragge..
