'A NEVICATA A NAPULE
Stammatina i' me sò scetato a bonnora tutto stunato ,
'a mamma mia io m' haggiu sunnato ca mme parlava ,
e all'intrasatto che llacreme alluocchie me sò scetato .
P''a casa sentevo n'aria fredda pecchè fora nevicava .
Che splennore !....Che stupore !.... Pe' mme na nuvità ,
mai vista Napule bbella janca cummigliata tutta 'e neve !
Po' terrazziello mio tanta aucelluzze 'nfruddulite 'a vulà ,
piante e stenditore che panne spase tutte chine 'e neve .
Mme pareva ca dint' a nu cazone mio spase nce stev' io
arinte, era gunfiato e da niro chill'era addeventato janco .
P' 'a surpresa , haggiu telefonato a tutte 'e pariente mie
pe' cchistu bbellu juorno , e bbussato 'a signora affianco :
Mèh, dicìtelo Donna Carmè , sta veduta do terrazziello
mio ve piace ? < Don Cì , è na vista veramente bbella !
I' songo vecchia cheste ggià 'o verette, ah tiempe bbelle
e na vota , m' arricordo ca era 'o 56', allora i' ero zetella ! >
Donna Carmè . a cunte fatte , allora vuje ve site spusata
grussicella ?! < Ah , che v' aggia dì , se vere ch ' ancora
nunn'era 'o mumento, allora scegliere uno oppure n'ato
pe' mme era cumplicato chille mme fermavano a tutt' ora ! >
All' ànema da palla ! Chell' è brutta , ma è assaje curtese ,
figuràteve ca quanno rire me pare overo na giappunesa ,
dice pure nu cuòfano 'e fessarie , nu centenaro 'o mese ,
dicette pure ca jeve pazza pe' essa nu nobbile marchese !
< Cirù , scusa si io te inderrompe, ma nun stive parlanno
da nevicata ?! > M' ha ditto 'a signora mia a chell' ora
quanno fora chella nevicata era ggià fernuta , e quanno
'o sole sciuglieva 'a neve a terra , e na voce diceva fora :
< Napulitane , è stata sulo n' illusione , i' songo 'o Signore ,
n' ata nevicata i' v' ha manno tra na cinquantina d' anne ,
vuie tenite 'o sole, chillu mare ca parla ca luna a tutt' ora ,
tenite 'e cchiu bbelli canzone , fosse nu tuorto , nu danno
ca nun me sento e vò fà..... jàh, penzate felice 'a campà !>
Ciro Trocciola
27 febbraio 2018
