ANTONIO RUGGIERO BUSCIARDA

BUSCIARDA

Vicin' a mme tu triemme e tte staje zitta,

si' assaje cchù ddoce quanno tu me guarde;

'stu bbene 'o ttiene dint''o còre scritto,

ma quanno arape 'a vocca si' busciarda.

D''e sentimente 'mpietto ca tu tiene,

tu si' ggelosa e nun 'e ffaje capì;

'e ttiene arravugliate 'int''e ccatene,

e ssott' a ttutt''e no, nce sta nu sì.

ANTONIO RUGGIERO

ANTONIO RUGGIERO ‘A DUMMENECA D’’E PPALME

‘A DUMMENECA D’’E PPALME

‘Ncopp’’e scalelle ‘e ‘na chiesiella antica,

cu ‘e ramuscielle aulive dint’’e mmane;

‘e vvoce d’’e ccriature, benerico,

se mmescano cu ‘o suono d’’e ccampane.

Se stenne dint’ a ll’aria n’armunìa

cu ‘na carezza doce ‘e primmavera,

ca spanne addore, e vveste d’allerìa

chi tène ancora n’anema ca spera.

Chi tène ‘o còre tiennero e ggentile,

chi ‘nnanze a cchistu munno scumbinato,

dint’ a cchesta dummeneca d’abbrile,

se scorda d’isso e ppenza sulo a ll’ate.

A cchi chiagnenne nun tène cchiù vvoce,

chi soffre ancora e nun se fa capace;

chi mòre sott’’o piso ‘e quacche croce

campanno senza nu mumento ‘e pace.

A qquacche chiesiella assaje luntana,

addò ‘e ccampane sònano, ma a mmuorto...

Addò se campa senza cchiù ddimane,

nisciuno Gesù Cristo è mmaje risorto!

 ANTONIO RUGGIERO

Ricordi Autore Anonimo

Ricordi

Cos'è per me un ricordo?

È un pensiero custodito nei cassetti della mente

È un ordigno pronto a esplodere in un angolo del cuore

È un aliante che prende il volo quando l'anima si arrende

È un filo, un appiglio a te legato quando lasci via libera al passato.

Un ricordo è un'emozione che vive ancora sulla pelle

e ti invade

ti sorprende

fino a coglierti di spalle.

Antonio Ruggiero MAGGÌA D’AMMORE

Antonio Ruggiero

MAGGÌA D’AMMORE

Ma qua’ viuline e ssuone ‘e manduline,

è mmuseca ca nun me dà calore;

d’’o senzo ‘e chesta vita, io cerco ‘o cchino,

m’abbastano ‘e suspire tuoie d’ammore.

E ppo’ comme si fosse ‘na maggìa,

dint’ a ‘na cattedrale antica e austèra,

sent’’e suspire tuoie:che sinfunìa!

N’ organo sòna e nun me pare overo.

ANTONIO RUGGIERO QUANNO STAJE SOLA

Dedicata a chi crede nel vero amore.

QUANNO STAJE SOLA

Ncopp' a 'stu munno chino chino 'e ggente,

ognuno è ssulo pure mmiezz' a ll'ate;

comm' a 'na serpe, striscia lentamente,

chella malincunìa ch'ammozza 'o sciato.

Pirciò quanno staje sola, ammore mio,

scamazzela 'sta sèrpe ch'avvelena;

si pienze a qquantu bbene te vogl'io,

tu certamente starraje cchù serena.

ANTONIO RUGGIERO

ANTONIO RUGGIERO QUANNO CHIAGNE NU SCIORE

QUANNO CHIAGNE NU SCIORE

Aggiu visto ddoje rose int''o ciardino,

una schiuppata e n'ata già appassita;

'a primma rosa se teneva 'nzino,

chell'ata secca secca e ssenza vita.

Comme se chiagne a 'na perzona cara,

io l'aggiu visto 'e chiagnere 'stu sciore;

nun è acquariccia* 'sta guccella amara...

E' cchiant''e rosa...E' llacrema d'ammore!

* acquariccia - brina o rugiada

ANTONIO RUGGIERO