PICCERENELLA
Quann’’e ‘sta vita te ne faje nu suonno,
quanno sustiene ca nun po' ffernì,
quanno parlanno triemma comm’’e ffronne,
piccerenella e ttennera, tu si.
Ma dimme tu, che sso’, che sso’’e pparole,
quanno m’abbasta sulo nu suspiro...
Nu sguardo e ‘na carezza me cunzola,
si pure ‘o cielo è ccupo e nniro niro.
Ll’ammore, no, nun è ffilosofìa,
nun nasce comme nasce nu penziero,
ma dimme tu a cche sserveno ‘e ppuisie
quanno nu còre è ssemplice e ssincero.
Embè tu nun ‘o ssaje ca io mett’’e scelle
e vvolo cchiù luntano ‘e nu cardillo;
me faje truvà ‘ntrasatto ‘mmiezz’’e stelle,
quanno m’azzicche ‘mmocca nu vasillo.
Quanno t’attigge a ffemmena matura,
quanno te sfuorze ‘e nun me fa capì,
ma si rrimasta ancora ‘na criatura...
Piccerenella e ttennera, tu si.
ANTONIO RUGGIERO
Nessun commento:
Posta un commento